Dard Men adog’siz dardimni ko’mdim qalbim qatiga, Yorim achchiq so’zlarin yozdi so’nggi xatida. Shu on chirs-chirs uzildi hayotimning zanjiri Tomchi yosh qotib qoldi ko’zlarim sarhadida

Dard

Men adog’siz dardimni ko’mdim qalbim qatiga,

Yorim achchiq so’zlarin yozdi so’nggi xatida.

Shu on chirs-chirs uzildi hayotimning zanjiri

Tomchi yosh qotib qoldi ko’zlarim sarhadida.

Vaqt deyilmish tushuncha mazmunini yo’qotdi,

Shirin tushimdan go’yo kimdir majbur uyg’otdi.

Eh qandayin dunyosan, orzularim sarobmi?!

Ko’z tegdi-ya , ko’z tegdi…! Tuyg’ular meni sotdi.

Sarob

Xayol ummonida suzib men yolg’iz,

Orzular kemasin makon etaman.

Ba’zida qirg’oqqa yetaman so’zsiz

Goho, suv qa’riga cho’kib ketaman.

Yuragim xuvillab qolgandek go’yo

Chiroq yoqsa zulmat bosib ketadi.

Ayozdan ham sovuq ko’rinar dunyo,

Nahot, hayot shunday davom etadi?!

Men kemada sayr etayotgan chog’

Ro’y berdi ummonda kuchli bir shamol,

Shamoldan to’lqinlar ketar chayqalib,

Men tomon kelardi ular bostirib…

Shu zamon ro’y berdi ajib hodisa-

Tushib qoldim sassiz , nursiz olamga.

Bu yerda ko’rinmas bepoyon ummon,

Na yashil tabiat, na ko’m-ko’k osmon.

O’yladim hayotda bir haqiqat bor:

Shukur qilib yashash- eng katta baxtdir.

Hayotning qadriga yetmoqlik darkor

Yashamoqning o’zi buyuk ne’matdir!