Дала экинларининг асосий зараркунандалари

Таърифи. Капалагининг узунлиги 10 мм га яқин, қанотлари ёзилганида икки учи ораси 20—22 мм келади. Олдинги қанотлари тахминан учбурчак шаклида бўлиб, уларнинг олдинги четлари қайрилиб туради. Кейинги қанотлари сербар бўлади. Мўйловчалари устида майда тукчалар бор, бу тукчалар эркак капалакларда узунроқ бўлади. Эркакларининг иккинчи жуфт оёқ панжаларида елпиғичсимон таралиб турган тукчалар бор.
Капалакларининг ранги жуда ўзгариб туради. Одатда олдинги қанотлари яшил тусда бўлади; бироқ сариқ ва ҳатто кул ранг, ёки қўнғир сариқ, ялтироқ сариқ ёки қўнғир қанотли капалаклар ҳам учрайди. Баъзан капалакларнинг олдинги қанотларида ҳеч қандай гул бўлмайди, кўпинча қанотларининг ташқи четлари ёнидан 3 та тўлқинсимон кўндаланг чизиқ ўтади; баъзи капалакларда олдинги қанотларнинг ташқи четлари ёнида бундай чизиқлар ўрнида, биттадан қорамтир доғлар бўлади. Капалакларнинг судак туркумида олдинги қанотлар бўйлаб оч рангли чизиқ ўтади. Кейинги қанотлари оқ ёки кул ранг тусда бўлади.
Тухуми овал шаклда; ранги кўкиш, зангори ёки кул ранг, бир учи кертикли дўмбоқчалар билан қопланган, узунлиги 0,5 мм ча келади.
Қуртларининг танасидаги биринчи бўғимдан бошқа ҳамма бўғимларида тўртта йўғон ҳамда юмшоқ тикан ва ҳар қайси тиканнннг учида биттадан қилча бор. Тўртинчи бўғимида (нафас тешиги ёнида) яна иккита калта тикан ва ўн иккинчи бўғимда тағин иккита катта тикан жойлашган.
Қуртларининг ранги ҳам, капалакларники сингари, жуда ўзгариб туради. Уларнинг ранги оқиш ёки оч яшил тусдан тортиб тўқ жигар ранг тусгача бўлади. Ўн иккинчи бўғимдаги тиканлар оч рангли; танасининг охирида қизил ёки қўнғир нақш бор. Қуртининг калласи қўнғир тусда бўлиб, унинг устидан кўндаланг чизиқ ўтади. Ривожланиб бўлган қуртининг узунлиги 14—17 мм келади.
Ғумбаги сарғиш қўнғир, кўкрак бўлими ва танасининг кейинги қисми анча қорамтир тусда. Танасининг охирги ёнларида учтадан тишча бор. Ғумбакнинг узунлиги 9 – 11 мм келади; ғумбаги моки шаклидаги жуда пишиқ деворли пилла ичига жойлашади. Пилланинг бир учи чўзинчоқ, иккинчи учи тўмтоқдир. Пилланинг ички томони оқ рангли, ташқи томони эса кул ранг ва қўнғир тусда товланиб турадиган иплардан иборат. Ғубагининг узунлиги 10—15 мм келади.