Дала экинларининг асосий зараркунандалари

Кураш чоралари. Қандалага қарши кеч кузда ёки қиш фаслида беда анғизига ўт қўйиш тавсия қилинади. Бунинг учун бедапояга ғалла похоли ёйилади. Сўнгра похолга шамол эсаётган томондан ўт қўйилади, ўт қўйиш бедага зарар қилмайди. Беда анғизига қишда ёки кеч кузда ўт қўйилганда беда қандаласидан бошқа зараркунандаларнинг, айниқса туганак узунбуруни ва фитономуснинг ҳам анчагинаси қирилиб кетади. Беда анғизини ёндириш ўрнига беда ҳосилини кеч кузда тақир қилиб ўриб олса ҳам бўлар эди, бироқ ҳозирча бунинг учун махсус қуроллар чиқарилмаган.
Камида иккинчи йил ўстирилаётган уруғлик бедапоялар кузда чимқирқарсиз плуг билан 22—25 см чуқурликда ҳайдалади.
Қишлаётган зараркунандаларни камайтириш учун эрта кўкламда ёки кеч кузда бегона ўтларни бутунлай йўқотиш чорасини кўриш керак.
Беда қандаласига қарши кимёвий усулда курашда уруғлик бедапоянинг ҳар гектарига 15—20 кг ҳисобидан гексахлоран чангланади; бироқ беда гулларини чанглаётган ҳашаротларга зарар етказмаслик учун, гексахлоранни беда айнан гуллаётган вақтда чангламаслик керак. Хашаки беданинг ҳар гектарига 40—50 кг ҳисобидан 6—7 % ли анабадуст ёки 4—5 % ли никодуст чангланади. Бу дориларни уруғлик бедага чангласа ҳам бўлади, лекин гексахлоран яхшироқ натижа беради. Чанглаш ўрнига анабазин-сульфат ёки никотин-сульфат эритмасини пуркаш ҳам мумкин. Бунда 2 г анабазин-сульфат ёки 1,5 г никотин-сульфатга 4 г суюқ ёки 2 г қаттиқ совун қўшилади. Аммо уруғлик бедага гексахлораннинг совунли суспензиясини пуркаш афзалроқ кўрилади, суспензия 1 л сувга 20 г гексахлоран ва 2— 4 г совун қўшиб тайёрланади. Бедапоянинг ҳар гектарига 1000—2000 л эритма ёки суспензия пуркалади.
Кўкламда, беда қандаласининг личинкалари тухумдан чиқа бошлаган даврда гексахлоран хашаки бедага ҳам чангланади. Хашаки бедага анабазинли ва никотинли препаратлар беда ҳосилини ўришдан камида 2—2,5 ҳафта олдин чангланади ёки пуркалади.
Беда қандаласини ўлдирадиган инсектицидлар бир вақтнинг ўзида беда битларини ҳам қиради. Беда қандаласига қарши курашда механиқ тутқичлар ҳам ишлатилади.