Cooperate with co-workers

Ходимларга асосий иш ҳақи ва бошқа даромадларнинг ҳисобланиши ва ҳисоби
25-МАЪРУЗА

МАЪРУЗА РЕЖАСИ:

1.Ходимларга асосий иш ҳақини ҳисоблаш тартиби ва ҳисоби.
2.Ходимларга ишланмаган вақт учун тўловларнинг ҳисобланиши ва ҳисоби.
3.Ходимларга бошқа даромадларнинг ҳисобланиши ва ҳисоби

Ходимларнинг меҳнатга ҳақ тўлаш тарзидаги даромадларида уларнинг асосий иш ҳақи муҳим ўрини тутади. Асосий иш ҳақи деганда ходимнинг ҳақиқатда ишлаган вақти ёки бажарган иши учун ҳисобланган иш ҳақи тушунилади.

Асосий иш ҳақини ҳисоблашга қуйидаги ҳужжатлар асос бўлади:

Вақтбай ишловчилар учун

• ойлик лавозим маоши белгиланган штат жадвали ва ишга чиқиш ҳисоби табели

Ишбай ишловчилар учун

• бажарилган ишларнинг ҳажмини тасдиқловчи ҳужжатлар (нарядлар, маълумотномалар, ҳисоботлар, далолатномалар ва бошқалар), шунингдек бир бирлик иш учун белгиланган иш ҳақи меъёри ва ишга чиқиш ҳисоби табели (ишни коллектив тарзда бажарувчилар учун).

вақтбай иш ҳақи шаклида ишловчи ходимга асосий иш ҳақи суммаси унинг ҳақиқатда ишлаган соатлари ёки кунлари сонини бир соатлик ёки бир кунлик ўртача иш ҳақи миқдорига кўпайтириш йўли билан топилади. ходимнинг бир соатлик ёки бир кунлик ўртача иш ҳақи миқдори унинг штат жадвали бўйича белгиланган лавозим маошини ҳисобот ойидаги календар иш соатлари ёки кунлари сонига бўлиш орқали топилади.

Мисол. Бухгалтернинг штат жадвали бўйича лавозим маоши –1 000 000 сўм. Январ ойидаги календар иш кунлари сони –25 кун. Январ ойида у табел бўйича 15 кун тўлиқ ишлаган, қолган кунлар учун касаллик варақасини тақдим этган.

Юқоридаги мисол шартига кўра, бухгалтернинг бир кунлик ўртача иш ҳақи суммаси 40000 сўм (1000000 : 25 ), январда ҳақиқатда ишлаган кунларига ҳисобланадиган иш ҳақи суммаси 600000 сўмни (40000 х 15) ташкил этади.