Choynak uchun qalpoq tikishni o'rganish

CHOYNAK UCHUN QALPOQ TIKISHNI O'RGANISH

Hammamiz chinni choynakda maromiga yetkazib damlangan choyni rosa yaxshi ko'ramiz. Ammo qishning sovuq kunlarida choy tez sovub qolishi tabiiy. Bugun biz mazali choylarimizni sovushiga yo'l qo'ymaydigan choynakpo'sh tikish tartibi bilan tanishib olamiz.

Choynakpo'sh tikish uchun qalpoq tikmoqchi bo'lgan choynagimiz aylanasi va balandligini o'lchab olamiz.

(Choynak aylanasi + 6) : 2 = Andoza kengligi

Choynak bo'yi + 3 = Andoza bo'yi
Hisobda chiqqan raqamlar asosida andoza chizib tayyorlab olinadi.

Shu andoza bo'yicha detallar bichib olamiz:

2 ta detal asosiy matodan ustgi qismi;
2 ta detal issiq saqlovchi matodan (Vatin, qavilgan paxta yoki qavilgan sintefon) oraliq qismi;
2 ta detal astar qismi bichiladi.
Astar qismi albatta tabiiy tolali matodan bichilishi shart. Issiq haroratda sun'iy tolali mato erib ketishi mumkin.

Asosiy mato orqasiga isituvchi mato biriktiriladi. Astar ustki qismi asosiy gazlama ustki qismiga qaratib qo'yilib pastgi tekis tomoni tikib olinadi.

Tikilgan chok astar tomonga o'girib dazmollanadi. Ikkala tomon detallari ham shu tartibda tikib, dazmollab olinadi.
Qalpoqning yuqori qismiga ilgakcha qotirib olinadi.
Ko'rsatilganidek atrofi tikib chiqiladi. Faqat astar ichidan o'girish uchun 5 - 6 cm oraliq joy tikmay qoldirib ketiladi.
O'girib olingandan keyin, o'girgan chokimizni dazmolda orasta holga keltirib, mashinka chokda chiroyli qilib tikib qo'yamiz.
Barcha choklarni chiroyli qilib dazmollaymiz.