Chirchiq davlat pedagogika instituti gumanitar fanlar fakulteti

Ishning o`rganilish darajasi. Husni ta’lil san’atining nazariy masalalari, uning mumtoz she’riyatimizdagi o`rni, daho ijodkorlar va taniqli sohibi kalomlarimiz ijodidagi qo`llanish ko`lami haqida adabiyotshunoslikka oid ilmiy asarlarda anchagina ma’lumotlar berilgan. Arab, fors va turkiy tillarda yaratilgan badiiyat ilmiga doir ko`plab kitoblarda, xususan, Muhammad Umar Roduyoniyning “Tarjuman ul-balog`a”, Rashididdin Vatvotning “Hadoyiq us-sehr fi daqoyiq ash-she’r”, Shams Qays Roziyning “Al-mo`jam”, Atoulloh Husayninyning “Badoyi us-sanoyi”, Ahmad Taroziyning “Funnun ul-balog`a” kabi asarlarida ushbu san’atning tabiati, xususiyatlari, turlari bayon qilingan. G`ayritabiiy talqin usulining badiiy timsollar yaratish, asar ta’sirchanligi, josibasini ta’minlashdagi ahamiyati Atoiy, Lutfiy, Alisher Navoiy, Ogahiy kabi ijodkorlarning husni ta’lil san’atidan foydalanishdagi mahorat qirralari akademik Izzat Sultonov va Alibek Rustamovning ishlarida, taniqli adabiyotshunos olimlar Y.E.Bertelsning “Istoriya persidsko-tadjikiskoy literaturi”, Yoqubjon Is’hoqovning “So`z san’ati so`zligi”, Rahmonqul Orzibekovning “She’r san’atlari tahlili”, Vahob Rahmonovning “She’r san’atlari” kitoblarida va boshqalarning tadqiqotlarida o`z ifodasini topgan. Adabiyotshunos olim Anvar Hojiahmedovning “Husni ta’lil” kitobida Navoiy va Navoiygacha bo`lgan ijodkorlar g`azallarida husni ta’lil san’ati, XVI-XX asrlar she’riyatida Navoiy an’analari hamda husni ta’lil san’atining timsollar olami xususida keng to`xtalib o`tilgan.