Chet tili imtihoni uchun ro‘yxatdan o‘tish bo‘yicha yo‘riqnoma

Chet tili imtihoni uchun ro‘yxatdan o‘tish bo‘yicha yo‘riqnoma
Davlat test markaziFebruary 02, 2021

Tizimga kirish
Davlat test markazining interaktiv xizmatlar portali, ya’ni my.dtm.uz saytiga kirilganda dastlab “Tizimga kirish” oynasi ochiladi.
Oldin ro‘yxatdan o‘tgan talabgorlar telefon raqami va parolini kiritgan holda “Kirish” tugmasini bosib, tizimga kirishi va undan foydalanishi mumkin.

1.Ro‘yxatdan o‘tish
Tizimdan birinchi marta foydalanayotganlar esa ro‘yxatdan o‘tishlari lozim. Buning uchun “Ro‘yxatdan o‘tish” tugmasi bosiladi.

Ro‘xyxatdan o‘tish
Mazkur oynaga telefon raqam va parol (foydalauvchi tomonidan o‘ylab topilgan ixtiyoriy parol) yoziladi.
So‘ngra, sahifada keltirilgan arifmetik ifodaning qiymati yozilib, “Ro‘yxatdan o‘tish” tugmasini bosiladi.

Tasdiqlash
Telefon raqamini tasdiqlash uchun tizimga kiritilgan telefon raqamiga SMS-xabar yuboriladi.
Tasdiqlash oynasiga SMS-xabarda yuborilgan 5 xonali raqam kiritiladi hamda “Tasdiqlash” tugmasi bosiladi.

Shaxsiy ma’lumotlar
“Shaxsiy ma’lumotlar” bo‘limiga jismoniy shaxsni shaxsiy identifikatsiya raqami, pasport seriyasi, pasport raqami va millati kiritiladi va qonun doirasida ma’lumotlardan foydalanishga rozilik bildirilib, “Saqlash” tugmasi bosiladi.

Doimiy yashash manzili
“Doimiy yashash manzili” bo‘limidan viloyat va tuman (shahar) tanlanib, to‘liq manzil yoziladi. So‘ngra, “Saqlash” tugmasi bosiladi.

Umumta’lim muassasasi
“Umumta’lim muassasasi” bo‘limiga foydalanuvchi tamomlagan ta’lim muassasasi ma’lumotlari kiritiladi va “Saqlash” tugmasi bosiladi.
Agar talabgor ta’lim muassasasini tamomlamagan bo‘lsa, “Yopish” tugmasini bosib, mazkur bo‘limni to‘ldirmasligi mumkin.
Shundan so‘ng, talabgor my.dtm.uz saytida ro‘yxatdan o‘tgan hisoblanadi.

2.Chet tilini bilish va egallash darajasini aniqlash test sinoviga onlayn ariza berish
Endi chet tilini bilish va egallash darajasini aniqlash test sinovi (xalq tilida CEFR) uchun ro‘yxatdan o‘tishni ko‘rib chiqamiz.

Bosh sahifa
Buning uchun bosh sahifadan “Milliy sertifikatlar” bo‘limiga kiriladi.

Milliy sertifikatlar
Mazkur bo‘limdan talabgor test topshirmoqchi bo‘lgan chet tili tanlanadi.

Oferta shartnomasi
Shundan so‘ng, foydalanuvchiga oferta shartnomasi taqdim etiladi.
Oferta shartlari bilan tanishgandan so‘ng, “Shartnoma shartlarini qabul qilish” tugmasi bosiladi.

Test sinovi uchun ariza berish
Mazkur sahifadan imtihon topshirish oyi, imtihon topshirish hududi va tilni bilish darajasi tanlanadi va “Saqlash” tugmasi bosiladi.
Bunda talabgorlar imtihon topshirish hududi sifatida Qoraqalpog‘iston Respublikasi, viloyatlar va Toshkent shahridan birini tanlab, o‘zlari tanlagan hududda test sinovida ishtirok etishlari mumkin.

Test sinovida ishtirok etishni tasdiqlash
Test sinovida ishtirok etishni tasdiqlash uchun talabgorning telefon raqamiga SMS-xabar yuboriladi.
Tasdiqlash oynasiga SMS-xabarda yuborilgan 5 xonali raqam kiritiladi hamda “Tasdiqlash” tugmasi bosiladi.

Invoys
Shundan so‘ng, test sinoviga to‘lovni amalga oshirish uchun invoys hosil bo‘ladi.
To‘lovni Click, Payme, UPAY kabi elektron to‘lov tizimlari yoki bank kassalari orqali amalga oshirish (14 xonalik invoys raqamiga) mumkin.
To‘lov amalga oshirilgandan so‘ng, test sinovi uchun “Ariza” shakllanadi. Mazkur arizani yuklab olish lozim.

3.Hujjatlarni taqdim etish
Test sinovi uchun ariza berib, to‘lov amalga oshirilgandan so‘ng, tegishli hujjatlarni Davlat test markaziga taqdim etish lozim.
Taqdim etiladigan hujjatlar (hujjatlar talabgorning shaxsan o‘zi tomonidan topshiriladi):

• 
  pasport (pasport yoshiga yetmaganlar tug‘ilganlik haqida guvohnoma) nusxasi;
  
• 
  onlayn arizaning chop etilgan nusxasi;
  
• 
  to‘lov amalga oshirilganlik to‘g‘risida hujjat nusxasi (kvitansiya).
  

Hujjatlar test belgilangan oyning dastlabki 5 ish kunida Davlat test markazi va uning hududiy bo‘limlarida qabul qilinadi.

Davlat test markazining rasmiy sahifalari:
Telegram | Facebook | Instagram | YouTube