Chemok: tongmul

Muvaffaqiyatli yurishlardan so‘ng qo‘zg‘olonchilar Seonyusada mag‘lubiyatga uchradi va adib Manjuriyaga ketdi, ammo aslo kurashdan toʻxtamadi. Manjuriyaga ketar chog‘ida “Menda g‘azab bor, lekin og‘riqlarga dosh beraman va vaqt kelishini intizorlik bilan kutaman” deydi va quyidagi she’rni yozadi: 어제 밤도 생각나고 오늘 아침도 생각나네. 나에게 무엇을 생각하느냐고 묻는가, "구름 서른 나무"에 친구를 생각한데 . Kecha tun ham oʻyladim Bugun ertalab ham esladim. Mendan nimani oʻylaysan deb soʻrasangiz, “Bulut qoplagan daraxt” misol koʻrinmas doʻstlarimni oʻylayman. She’rning 1 va 2- satrlari vaqtga ishora beradi, ya’ni Lyu Rin Sok quvg‘inlik paytining har kunida vatanini, jonajon doʻstlarini eslaydi, sog‘inadi. “구름 서른 나무” iborasi “친구가 멀리 떨어져 있을 때 친구를 그리워하는 뜻” - doʻstlardan uzoqda boʻlganda ularni sog‘inish ma’nosida qoʻllanilgan. She’rdagi asl ma’no vatanni sog‘inish, qoʻmsashdir, bulutlar soyasida qolgan daraxt mamlakatni dushmanlar ishg‘ol qilganidan darak beradi.

Lyu Rin Sok nazdida erkinlik: “자유란 곧 사양하지 않음이며, 사양함이 없다면 곧 싸움이다” – “erkinlik taslim boʻlmaslikni anglatadi, taslim boʻlmaslik esa, bu – kurashishdir” tarzida yangradi. Erkin koʻnglim chiday olmas bu siqiq, bu bogʻlangan, bu “egalik” turmushda deya hayqirgan Choʻlpon “tor qafasdan oʻzini qutqargali” urinayotgan, intilayotgan xalqini mustamlaka kishanlarini parchalab tashlash uchun qoʻzgʻolishga chaqiradi.

Ijtimoiy dard ijodkorning shaxsiy dardiga aylanmasa, ijodkor oʻsha dardni chinakamiga qalbidan kechirmasa “yalangʻoch ijtimoiylashuv” yuzaga keladi. Choʻlpon oddiy fuqaro sifatida ham, ijodkor sifatida ham ona yurtining mustaqillikdan yiroq, qaramlikda yashashini yurak koʻtarolmaydigan dard deb hisoblagan. Jumladan, “Tilak yoʻlida” sheʼrida: Ketgan yoʻlim toʻgʻri yoʻldir, ketamen, Qanday toʻsiq mone boʻlsa, oʻtamen, Men ketamen, tilak, deya ketamen, Hech tilaksiz quruq jonni netamen? Bir jon ekan, mayli qurbon etamen!.. – deya el-yurt, ona Vatan yoʻlida qurbon boʻlishdan ham qaytmadi. Shoirning yurak qoni bilan yozilgan bu she’rlari vatandoshlarida o‘zbek diyoriga otashin muhabbat, mustamlakachilarga nafrat, erk va hurriyat g‘oyalariga sadoqat tuyg‘ularini tarbiyaladi.