Burg‘ilash quduqlari elementlariga nimalar kiradi?

Bostirish yo‘li bilan quduqlarni burg‘ilash

Karotaj ishlarini olib borish va namunalar olish uchun qidiruv quduqlarini yumshoq jinslarda burg‘ilash maqsadida yuqori yuklama berish yo‘li orqali burg‘ilash snaryadini bostirish usuli bilan burg‘ilash ishlatiladi. Bu burg‘ilash usuli foydali qazilmalarni qidirishda, gidrogeologik tadqiqotlar, muhandislik-geologik izlanishlar va boshqa geologik ishlarda ishlatiladi. Burg‘ilash snaryadini jinslarga bostirish usuli bilan burg‘ilash usuli cheklangan sharoitlarda ishlatiladi. Bu usul diametri 50—168 mm va chuqurligi 30 m gacha bo‘lgan quduqlarni burg‘ilash imkonini beradi. Chuqurligi 30 metrgacha bo‘lgan quduqlardagi gruntlarning asosiy fizik-mexanik xususiyatlarini o‘rganish uchun penetratsion zondirlash usuli ishlatiladi. Bu holda datchik bilan jihozlangan o‘lchov zondi burg‘ilash quvurlari kolonnasiga ulanib qo‘yiladi. Gidravlik qurilma yordamida zond ulangan burg‘ilash quvurlari kolonnasi yumshoq gruntlarga 80—120 kN miqdordagi statik yuklama bilan bostiriladi. Bostirish jarayonida o‘lchov zondidagi datchik o‘tilayotgan gruntlarning parametrlari haqidagi ma’lumotlarni aloqa kanali orqali yer ustidagi apparatga uzatadi. Muhandislik-geologik suratga olish va izlanishlarda o‘ziyurar penetratsion karotaj СПК-Т rusumidagi stansiya ishlatiladi. Chuqurligi 15 metrgacha bo‘lgan gruntlarni tadqiq qilish uchun ko‘chma УЗСК-3 rusumidagi statik zondlovchi konus qurilmasi ishlatiladi.