Бухгалтерия ҳисобининг халқаро стандарти 1

Тақдим этишнинг изчиллиги
45 Тадбиркорлик субъекти бир даврдан кейинги даврга молиявий ҳисоботлардаги моддаларни акс эттиришни ёки таснифлашни ўзгартирмасдан қолдириши лозим, бунда:
(a) тадбиркорлик субъекти фаолияти хусусиятининг аҳамиятли даражада ўзгариши ёки унинг молиявий ҳисоботларини қайта кўриб чиқиш натижасида, БҲХС 8 даги ҳисоб сиёсатларини танлаш ва қўллаш учун мезонларни инобатга олган ҳолда бошқа тақдимот ёки таснифлаш ўринлироқ бўлиши мумкинлиги очиқ намоён бўлмагунча; ёки
(б) МҲХС тақдимотда ўзгаришни талаб этмагунча.
46 Масалан, аҳамиятли даражадаги харид ёки ҳисобдан чиқариш, ёки молиявий ҳисоботлар тақдимотини қайта кўриб чиқиш молиявий ҳисоботларнинг бошқача тарзда тақдим этилишини талаб этиши мумкин. Тадбиркорлик субъекти ўз молиявий ҳисоботларининг тақдимотини ўзгартиради, фақатгина агар ўзгартирилган тақдимот фойдаланувчилар учун ишончли ва ўринлироқ бўлган маълумотларни таъминласа ҳамда ҳисоботлар кейинчалик ҳам ўзгартирилган ҳолда тақдим этилиши эҳтимоли бўлиб, бу қиёсланувчанликни пасайтирмаса. Моддалар бу каби ўзгартирилганда, тадбиркорлик субъекти ўзининг қиёсий маълумотларини 41 ва 42-бандларга мувофиқ қайта таснифлайди.
Тузилиш ва мазмун
Кириш
47 Ушбу Стандарт молиявий ҳолат тўғрисидаги ҳисоботда ёки фойда ёки зарар ва бошқа умумлашган даромадлар тўғрисидаги ҳисобот(лар)да, ёки капиталдаги ўзгаришлар тўғрисидаги ҳисоботда муайян маълумотлар очиб берилишини талаб этади ҳамда ушбу ҳисоботларда ёки изоҳларда ҳисоботларнинг бошқа сатрларида кўрсатиладиган моддаларнинг очиб берилишини талаб этади. БҲХС 7 “Пул оқимлари тўғрисидаги ҳисобот” пул оқими тўғрисидаги маълумотларни тақдим этишга нисбатан талабларни белгилайди.
48 Мазкур Стандарт баъзида “очиб бериш” атамасини, молиявий ҳисоботларда тақдим этиладиган моддаларни ҳам ўз ичига олган ҳолда, кенг маънода қўллайди. Маълумотларнинг очиб берилиши бошқа МҲХСларда ҳам талаб этилади. Мазкур Стандартнинг бирор қисмида ёки бошқа МҲХС да бошқаси назарда тутилмаган бўлганида, бундай маълумотлар молиявий ҳисоботларда очиб берилиши мумкин.