Бухгалтерия ҳисоби фани бўйича маъруза матни 3-мавзу

Иш ҳақидан ушлаб қолинадиган бошқа тўловлар бўйича ҳисоб-китоблар ҳисоби
Ижро варақалари алимент суммаларини ушлаш ва ўтказиб бериш учун асос бўлиб ҳисобланади. Олинган ижро варақаларини бухгалтерияда махсус журнал ёки карточкада рўйхатга олади. Ходимларнинг аризасига мувофиқ алиментлар қуйидаги ҳолларда ушланади: агар ушланмаларнинг умумий суммаси 50 % дан ошса, шунингдек агар суд қарори билан бошқа онадан бўлган болалар фойдасига, меҳнатга лаёқациз ота-оналар фойдасига, хотини (хотинлари) фойдасига.
Ижро варақалари бўйича олиб бориладиган ҳисоб-китоблар ҳисоби 6990 «Бошқа мажбуриятлар» счётида алоҳида ажратилган 6991 «Ижро ҳужжатлари бўйича ташкилот ва шахслар билан ҳисоб-китоблар» счётида юритилади.
Алимент ҳисобот ойи бўйича ҳисобланган иш ҳақи, вақтинчалик иш қобилиятини йўқотган даврида ҳисобланган нафақа суммасидан солиқлар ушлангандан кейин, шунингдек, ҳисобланган пенсия ва стипендия суммасидан ушланади. Алиментлар ушлаб қолинганда 6710 «Меҳнат ҳақи бўйича ходимлар билан ҳисоблашишлар» счётининг дебети ва 6990 «Бошқа мажбуриятлар» счётида алоҳида ажратилган 6991 «Ижро ҳужжатлари бўйича ташкилот ва шахслар билан ҳисоб-китоблар» счётининг кредити бўйича бухгалтерия ёзувлари амалга оширилади.
Иш ҳақи, пенсия ва стипендиялар тўлаш учун белгиланган уч кунлик муддат ичида алимент суммалари тўланиши ёки алимент олувчиларга ўтказиб берилиши керак. Ушлаб қолинган алиментлар тўланиши ёки ёки алимент олувчиларга ўтказиб берилиши 6990 «Бошқа мажбуриятлар» счётида алоҳида ажратилган 6991 «Ижро ҳужжатлари бўйича ташкилот ва шахслар билан ҳисоб-китоблар» счётининг дебети ва 5010 «Миллий валютадаги пул маблағлари» (нақд пулда), 5020 «Чет эл валютасидаги пул маблағлари» (нақд чет эл валютасида), 5110 «Ҳиоб-китоб счёти» (нақд пулсиз), 5210 «Мамлакат ичидаги валюта счётлари» (нақд пулсиз), 5220 «Чет элдаги валюта счётлари» (нақд пулсиз) ва бошқа пул маблағларини ҳисобга олувчи счётлар (нақд пулсиз) кредитда акс эттирилади.
Моддий ёрдам, ихтирочилик, рационализаторлик таклифлари учун берилган рағбатлантириш ва шу каби суммаларидан алимент суммаси ушланмайди. Кредитга сотилган товарлар бўйича ариза-мажбуриятларнинг ҳамма суммасини корхона банк кредити ҳисобидан савдо ташкилотларига ўтказиб берганда кредитга сотилган товарлар бўйича ушланма операциялар содир бўлади.
Шундай қилиб, меҳнатга ҳақ тўлаш ҳисобини тўғри ташкил қилиш, бугунги кунда ташки иқтисодий фаолият билан шуғулланувчи субъектларда фаолият кўрсатаётган ишчи ва хизматчиларнинг моддий аҳволини яхшилаш ҳамда уларнинг меҳнат қобилиятини тиклаш учун зарур бўлган молиявий ресурсларга бўлган эҳтиёжини қондиришдан иборатдир.