Буфер тизимлар (эритмалар). Буфер эритмаларнинг рН қийматлари

Aim.uz

Буфер тизимлар (эритмалар). Буфер эритмаларнинг рН қийматлари
Кучли кислота ёки кучли асоснинг оз миқдори қўшилганда рН қиймати деярли ўзгармайдиган эритмалар буфер эритмалар (буфер системалар) деб аталади.
Буфер эритма таркибида битта индивидуал (тоза) мода ёки моддалар аралашмаси бўлиши мумкин.
Индивидуал (айрим тоза) моддалар буфер эритмаларига, масалан, калий гидротартратнинг тўйинган эритмаси (25⁰Сда рН=3,567), калий гидрофталатнинг сувдаги 0,05мол/л концентрацияли эритмаси (25⁰Сда рН=4,008) натрий тетраборат (бура)нинг сувдаги (0,05мол/л) эритмаси (25⁰Сда рН=9,18 ва 38⁰Сда ) рН=9,07) ва х.з.
Моддалар аралашмасидан иборат буфер системаларга (тизимларга) қуйидаги аралашмаларнинг сувли эритмалари мисол бўлади:

• 
  Водород хлорид ва глицин:
  

HCl+NH₂CH₂COOH
(1,10-3,50 оралиғида рНнинг берилган қийматини ўзгартирмасдан сақлайди).

• 
  Натрий гидроксид ва калий гидрофталат
  

NaOH+KHC₈H₄O₄
(4,0-6,20 оралиғида рНнинг берилган қийматини ўзгартирмай сақлайди)

• 
  Калий дигидрофосфат ва натрий гидрофосфат
  

KH₂PO₄+Na₂HPO₄
(4,80-8,00 оралиғида рНнинг берилган қийматини ўзгартирмай сақлаши мумкин)

• 
  Сирка кислота ва натрий ацетат (ацетатли буфер)
  

СН₃СООН+СН₃СООNa
(3,8-6,3 оралиғида рНнинг берилган қийматини ўзгартирмай сақлай олади)
рН қийматини кенг оралиғида рН=1,81-11,98 уни ўзгартирмай сақлай оладиган универсал буфер тизимини ортофосфат, сирка, борат кислоталарнинг натрий гидроксид билан аралаштириб тайёрлаш мумкин.
Кўп ҳолларда кучсиз кислота ва унинг тузи (масалан, чумоли кислота ва натрий формиат НСООН+НСООNa – формиатли буфер) ёки кучсиз асос ва унинг тузидан (масалан, аммиак ва аммоний хлорид NH₃·H₂O+NH₄Cl) иборат буфер эритмалар ишлатилади.
Эритма муҳитини берилган рН қийматида ўзгартирмасдан сақлайдиган буфер эритмани унинг таркибий қисмларини ҳисобланган миқдорлари аралаштирилиб тайёрланади.
Буфер тизимларнинг икки типик турларини кўриб чиқамиз: кучсиз кислота ва унинг тузидан иборат тизим ҳамда кучсиз асос ва унинг тузидан иборат тизим.