Бозор ва тадбиркорлик

Судья банкротлик тўғрисидаги ишни кўриб чиқиш натижалари бўйича қўйидаги суд ҳужжатларидан бирини қабул қилади:
қарздорни банкрот деб топиш тўғрисидаги ва тугатишга доир иш юритишни бошлаш ҳақидаги қарор;
қарздорни банкрот деб топишни рад этиш тўғрисидаги қарор;
суд санациясини жорий этиш ва унинг муддатини узайтириш тўғрисидаги ажрим;
ташқи бошқарувни жорий этиш ва унинг муддатини узайтириш тўғрисидаги ажрим;
банкротлик тўғрисидаги иш юритишни тугатиш ҳақидаги ажрим;
қарздорни банкрот деб топиш тўғрисидаги аризани кўрмасдан қолдириш ҳақидаги ажрим;
келишув битимини тасдиқлаш тўғрисидаги ажрим.

Ишни кўришга тайёрлаш судья томонидан якка тартибда ва ишда иштирок этувчи шаxсларга xабар бермасдан амалга оширилади.
Қарздорни банкрот деб топиш тўғрисидаги ариза тушган кундан эътиборан судья ўн кундан кечиктирмай кузатувни жорий этиш ҳақидаги масалани ҳал қилади. Кредиторларнинг талаблари юзасидан қарздорда эътирозлар бўлса, судья қарздорнинг эътирозлари асослилигини текширади. Судьянинг қарздор эътирозлари (муваққат бошқарувчи илтимосномалари) асослилигини текшириши банкротлик тўғрисидаги ишни кўриб чиқишнинг белгиланган муддатига камида бир ой муҳлат қолганда ўтказилади.
Иқтисодий суд қарздорнинг эътирозлари асослилигини кўриб чиқиш натижалари асосида мазкур талабларни кредиторларнинг талаблари реестрига киритиш ёки мазкур реестрга киритишни рад этиш тўғрисида ажрим чиқаради. Ажримда кредиторларнинг, агар уларга нисбатан қарздорнинг эътирозлари асоссиз деб топилган бўлса, талаблари миқдори ва уларни қондириш навбати кўрсатилади. Кредиторларнинг талаблари юзасидан қарздорнинг эътирозларини кўриб чиқиш натижалари бўйича иқтисодий суд чиқарган ажрим устидан шикоят берилиши (протест келтирилиши) мумкин. Мазкур ажрим устидан шикоят берилиши (протест келтирилиши) унинг амал қилишини тўхтатиб қўймайди.
Банкротлик тўғрисидаги ишни суд муҳокамасига тайёрлаш пайтида, шунингдек банкротлик тўғрисидаги иш кўрилаётганда иқтисодий суд қарздорнинг молиявий аҳволини аниқлаш учун экспертиза тайинлашга ҳақли.
Банкротлик тўғрисидаги иш умумий тартибда кўрилганда қарздорни банкрот деб топиш тўғрисидаги ариза иш юритишга қабул қилинганлиги ҳақида ажрим чиқарилган кундан эътиборан икки ойдан ортиқ бўлмаган муддатда кўриб чиқилади. Алоҳида ҳоллардагина ишни кўриш икки ойдан ошмаган муддатга узайтирилиши мумкин.
Судья қарздорни банкрот деб топиш тўғрисидаги аризани ўз иш юритувига қабул қилаётган вақтда кузатувни жорий этиш ва муваққат бошқарувчини тайинлаш тўғрисида ажрим чиқариши мумкин.
Кузатув
Кузатув институтининг жорий этилишидан кўзланган мақсад кредиторлар манфаатларини ҳимоя қилиш, қарздор мол-мулкини талон-тарож қилинишини олдини олиш ва қонунда белгиланган ваколатларни амалга оширишдан иборат.

Кузатув банкротлик тўғрисидаги иш қўзғатилганда иқтисодий суд қарздорни банкрот деб топиш тўғрисидаги аризани иш юритишига қабул қилинган санадан эътиборан жорий этилади. Банкротлик тўғрисида иш қўзғатилган тақдирда иқтисодий суднинг аризани иш юритишга қабул қилиш тўғрисидаги ажримида кузатув жорий этилганлиги кўрсатилади.

Кузатув жорий этилган пайтдан бошлаб - мулкий ундирувлар бўйича ижро ҳужжатларини ижро этиш қонунда белгиланган тартибда тўxтатиб турилади; қарздор юридик шаxснинг муассислари (иштирокчилари) унинг таркибидан чиқиб кетиши муносабати билан қарздорнинг мол-мулкидан улушни (пайни) ажратиш ҳақидаги талабларини қондириш ва эмиссия қимматли қоғозлари бўйича дивидендлар ва бошқа тўловлар тўлаш таьқиқланади; муқобил бир xилдаги талабни ҳисобга олиш йўли билан қарздорнинг пул мажбуриятларини тугатишга, башарти бунда кредиторларнинг талабларини қондириш навбати бузилса, йўл қўйилмайди.