Биз ёшлар оив ва спидга қаршимиз! 1 декабрь- халқаро спидга қарши кураш кунига бағишлаб суҳбат

ОИВ-инфекциясини қандай аниқлаш мумкин?
Бунинг учун қон вирусга қарши ишлаб чиқариладиган антителоларга таҳлил қилинади. Таҳлилнинг энг кенг тарқалган ва ишончли усули — ИФА, яъни Иммун Фермент Анализ (таҳлил) ҳисобланади. Таҳлилнинг «мусбат» натижаси қонда вирусга қарши антителолар мавжудлигидан, яъни одамга ОИВ юққанлигидан далолат беради. Таҳлилнинг «манфий» натижаси эса, айни вақтда қонда вирусга қарши антителолар йўқлигини, яъни одамга ОИВи юқмаганлигини ёки одамга ОИВи юққан-у, лекин қонда вирусга қарши антителолар етарли эмаслигини билдиради.
Қонда антителолар вирус юкканидан кейин маълум вақт ўтиб ҳосил булади. Бу 3 ҳафтадан 6 ойгача бўлган муддатни ташкил этади. Юқиш хавфи юзага келган вақтдан бир неча кун ўтиб қонни таҳлил қилдириш ҳеч қандай маъно касб этмайди. «Очиқ давр» деб юритилувчи ушбу даврда таҳлил барибир «манфий» натижа беради. Қонни юқиш хавфи юзага келган кундан 3-6 ой ўтиб, таҳлил қилдириш аниқроқ натижа олиш имконини беради.
ОИВ-инфекциясини даволаш
Ҳозирги кунда ОИВ-инфекциясига қарши вакцина ёки ундан соғайтирадиган, дорилар мавжуд эмас, аммо организмда вирусларнинг кўпайиш тезлигини секинлаштирувчи ва ОИВ-билан зарарланиш ҳолатининг ОИТСга ўтиш даврини имкон даражасида узоқлаштирувчи дорилар мавжуд. Бу дорилар таъсирида ОИВ-инфекцияси сурункали тус олиши мумкин. Бунинг учун антиретровирусли мажмуавий даволаш усули қўлланилади.


Бироқ даволаниш 100% самара бермайди. Биринчидан, даволаниш жуда қиммат туради. Иккинчидан, ОИВ юққанларнинг кўпчилиги дорилар таркибига кирувчи компонентларни кўтара олмайдилар. Учинчидан, дорилар қабул қилиш тартиби ўта қаттиқ — кўп миқдордаги таблеткалар маълум оралиқда, ойлаб ва йиллаб қабул қилиниши керак. Шунингдек, кўп дориларга нисбатан ўрганиш ҳосил бўлиши ва вақт ўтиши билан даволаниш самара бермаслиги мумкин. Шунга қарамай, даволаниш кўп ҳолларда яхши натижалар беради: қонда вирусларнинг миқдори камаяди, шунингдек организмга кўрсатилаётган зиён ҳам камаяди. Ҳозирги кунда бу ОИВи юққанларнинг умрини узоқ йилларга чўзишининг биргина, ягона самарали усули ҳисобланади.