Бирлашган Миллатлар Ташкилотининг Халқаро товарлар олди-сотдиси шартномалари тўғрисидаги

П-бўлим. Зарарлар


74 - модда

Тарафларнинг бири томонидан шартнома бузилиши учун зарарлар шартнома бузилганлиги оқибатида иккинчи тараф кўрган зарарларга тенг бўлган суммани ташкил қилади. Бундай зарарлар шартномани бузган тараф шартномани тузиш вақтида унинг бузилишининг мумкин бўлган оқибати сифатида олдиндан сезган ёки олдиндан сезиши лозим бўлган зарардан ошмаслиги лозим, бунда ўша вақтда у билган ёки билиши лозим бўлган ҳолатлар ҳисобга олинади.

75 - модда

Агар шартнома бекор қилинган бўлса ва у бекор қилингандан сўнг сотиб олувчи оқилона муддатда ва оқилона тарзда эвазига товарни сотиб олган бўлса ёки сотувчи товарни қайтадан сотган бўлса, зарар тўланишини талаб қилаётган тараф шартнома нархи ва эвазига амалга оширилган фарқни ундириши, шунингдек 74-модда асосида ундирилиши мумкин бўлган ҳар қандай қўшимча зарарларни ундириши мумкин.

76 - модда

1) Агар шартнома бекор қилинган бўлса ва ушбу товарга жорий нарх мавжуд бўлса, зарар ундирилишини талаб қилаётган тараф, агар у 75-моддага асосан сотиб олиш ёки қайтадан сотишни амалга оширмаган бўлса, шартномада ўрнатилган нарх ва шартномани бекор қилиш вақтидаги жорий нарх ўртасидаги фарқни , шунингдек 74- моддага асосан ундирилиши мумкин бўлган ҳар қандай қўшимча зарарлар ундирилишини талаб қилиши мумкин. Бироқ, агар зарар ундирилишини талаб қилаётган тараф товар қабул қилингандан сўнг шартномани бекор қилган бўлса, шартномани бекор қилиш пайтига жорий нарх ўрнига шундай қабул қилиш пайтига жорий нарх қўлланади.

2) Аввалги банднинг мақсадлари учун жорий нарх бўлиб етказиб бериш амалга оширилиши лозим бўлган жойда устун бўлган нарх ҳисобланади ёки агар шу жойда жорий нарх мавжуд бўлмаса, товарни транспортда ташиш бўйича харажатлардаги фарқни ҳисобга олган ҳолда оқилона эваз бўлиб хизмат қиладиган бошқа жойдаги нарх ҳисобланади.

77 - модда

Шартнома бузилишига таянадиган тараф зарарни камайтириш учун ушбу ҳолатда оқилона ҳисобланган чораларни кўриши лозим, шу жумладан шартномани бузиш оқибатида юзага келадиган қўлдан берилган фойда. Агар у бундай чораларни кўрмаса, шартномани бузган тараф зарарларни камайтирилиши мумкин бўлган суммага қисқартирилишини талаб қилиши мумкин.