Биринчи қисм

Архивлар айнан ОАВ учун катта аҳамият касб этади. Улар орқали ўқувчилар интернет саҳифасида аввал (1 ой, 1 йил олдин) чоп этилган маълумотга мурожаат этиши, уни мавзуси, санаси ва рукнига қараб излаши мумкин.

Таҳлилий материаллар ўзининг қизиқарли мазмуни, енгил шаклда ёритилгани ва фактларнинг бисёрлиги билан ўқувчи диққатини ўзига тортади. Кўпинча бундай мақолаларда таққослаш, ўхшатиш, чуқур таҳлил ва мутахассис хулосаси каби журналистик элементлар жой олади. Интернет спецификаси эса бунинг баробарида қўшимча маълумот олиш учун ташқи манбаларни келтиришга ҳам имконият беради. Бу эса сўзсиз мақолани янада бойитади. Веб-саҳифада реклама сиёсати. Реклама сиёсати – бу таҳририятнинг коммуникатив сиёсати доирасида реклама соҳасидаги асосий стратегик йўналишларнинг йиғиндиси. Реклама веб-сайтларнинг ягона даромад манбаи саналади. Аммо бу, сайтда реклама қанча кўп бўлса, унинг самараси шунча ортади, деган гап эмас. Бозор иқтисодиёти шароитида ҳар қандай ОАВ ўз реклама сиёсатига эга бўлиши тақозо этилади. ОАВ веб-сайтида қандай турдаги рекламадан фойдаланиш мумкин?
Интернет-реклама бир неча хилга бўлинади:

• 
  Матнли реклама
  
• 
  Контекст реклама
  
• 
  Баннер рекламаси
  

Матнли реклама – мақола, интервью, лавҳа, корреспонденция каби жанрларда берилган информацион, таништирувчи ёки таҳлилий реклама ахбороти. Бундай кўринишдаги реклама веб-саҳифанинг маълумотга тегишли рукни ва мавзуси остида берилиши мумкин. Одатда бундай матн енгил услубда, изоҳлар билан тўлдирилган шаклда ва қайта алоқа воситасини кўрсатган ҳолда тузилади. Матннинг сўнггида, албатта, ўқувчиларга маълумотнинг реклама сифатида тақдим этилгани ҳақидаги изоҳ берилиши керак.
Контекст реклама кўп ҳолларда материал таркибида, фотосурат ортида яширинган маълумот сифатида берилади. Масалан, иқтисодий мавзуни ёритувчи мақоланинг таркибида бирор сўз орқали реклама материалига йўлланма берилади. Дейлик, маълумот энергетика соҳасидаги ўзгаришлар мавзусида таҳлилий ёритилади. Унда «энергоқувват» сўзи ажратилиб, шу хизматни ташкил этувчи муассаса ёки ишлаб чиқарувчи ташкилот сайтига, ёхуд у ҳақидаги маълумотга йўлланма берилади. Фотосуратлар ҳам шу тарзда йўлланма орқали бошқа манбага чиқиш имконини бериши мумкин.