Билим соҳаси Ижтимоий таъминот ва соғликни сақлаш 500000

Суспензиялар - Suspensiones
(Суспензия - бош келишик бирликда Suspensio, қаратқич келишик бирликда Suspensionis, қисқартмаси Susp.)
Суспензиялар сувда эримайдиган қаттиқ дорининг ўта майда заррачаларини бирор суюқлик (сув, ўсимлик ёғлари, глицерин)да муаллақ ҳолда бўлган сутсимон суюқ дори шаклидир. Коллоид эритмаларга нисбатан суспензиянинг муаллақ заррачалари йириқроқ бўлади (0,1 мкм дан катта). Заррачалари 0,1-1 мкм бўлса майин, 1 мкм дан катта бўлса қўпол суспензия ҳисобланади.
Суспензияларда қаттиқ дорининг майдалик даражаси кукунга нисбатан юқори бўлганлиги учун организмга дори тез таъсир кўрсатади. Суспензиялар ишлатишдан олдин чайқатилиб, ичишга, сиртга ишлатиш учун ва парентерал (м/и, бўшлиқларга) юбориш мумкин. Суспензияларга рецепт қисқартирилган ва кенгайтирилган кўринишда ёзилади.
Сувда тайёрланган ва официнал суспензиялар қисқартирилган кўринишда, ўсимлик ёғларида, глицерин, вазелин мойида тайёрланадиган суспензиялар кенгайтирилган кўринишда ёзилади.
Официнал суспензияларга рецепт Susp. сўзидан бошланиб, дорининг номлари ва умумий ҳажмдан кейин D.S. билан тугалланади.
Мисол: 100 мл гризеофульвин (Griseofulvinum, Griseofulvin) официнал суспензиясини 1 десерт қошиқдан кунига 3 маҳал ичишга буюрилсин. Ичишдан олдин чайқатилсин.

Rp.: Susp. Griseofulvini 100 ml

(Griseofulvin)
D.S. 1 десерт қошиқдан кунига 3 маҳал ичиш учун
(ичишдан олдин чайқатилсин).
Суспензиянинг концентрацияси берилган бўлса, рецептда суспензия концентрацияси умумий ҳажмдан олдин кўрсатилади.
Мисол: 10 мл 0,5% гидрокортизон ацетати (Hydrocortisoni acetas, Hydrocortisone) сақловчи сувли суспензияни кўз томчиси сифатида ишлатишдан олдин чайқатиб, 2 томчидан кунига 4 маҳал кўзга томизиш учун буюрилсин.

Rp.: Susp. Hydrocortisoni acetatis 0,5%-10 ml

(Hydrocortisone)
D.S. Кўз томчиси. Чайқатиб 2 томчидан кунига
4 маҳал кўзга томизиш учун.
Суспензиянинг кенгайтирилган кўринишида рецептда суспензиянинг таркибий қисмлари номи, миқдорларидан кейин, M.f. suspensio кўрсатилади.
Мисол: 50 мл стерил 0,5% ли трихомонацид (Trichomonacidum, Trichomonacidum)нинг вазелин мойи (Oleum Vaseline, Liquid parafin)даги суспензиясини сийдик пуфагига 10 млдан юбориш учун буюрилсин.
Rp.: Trichomonacidi 0,25
(Trichomonacidum)
Olei Vaselini ad 50 ml
(Liquid parafin)
M.f . suspensio
Sterilis!
D.S. Ишлатишдан олдин чайқатиб 10 млдан
сийдик пуфагига юбориш учун.