Berdaq atinda

Túsinik xat - xızmet tarawındaǵı, olarǵa baylanıslı máseleni, onıń ayırım táreplerin jazba túrde bayanlawshı hám mekeme (bólim) baslıǵına (ishki) yamasa joqarı shólkemlerge (sırtqı) jiberiletuǵın hújjet.
Ishki yamasa Jeke túsinik xatlar, tiykarınan, xızmetkerler (jumısshı, fermer, student) tárepinen mekeme baslıǵı atına jazıladı. Onda jumıs (yamasa oqıw) waqtında xızmetkerler (yamasa student) tárepinen jiberilgen geypara qáte-kemshilikler (máselen, jumısqa yamasa oqıwǵa kesh keliw, kelmey qalıw, joba yamasa ayırım tapsırmalardı waqtında orınlay almaw, belgilengen tártip-qaǵıydalardı saqlay almaw hám basqa jaǵdaylar, sebepler bayan etiledi hám dálillenedi. Túsinik xatlar ápiwayı qaǵazǵa jazıladı. Túsinik xatlar ádette, basshı talap etiwi menen jazıladı.
Ulıwma alǵanda túsinik xat tómendegi zárúrli bólimlerden ibarat boladı
1. Hújjet jollanıp atırǵan shólkem yaki hámeldar adamnıń tolıq atı.
2. Hújjet tayarlanǵan (jazǵan) mekeme.
3. Hújjettiń atı (Túsinik xat).
4. Hújjettiń teksti (mazmunı).
5. Qolı.
6. Sáne (hújjet jazılǵan waqtı).
Xızmet babında kárxana yamasa mekeme atınan jazılatuǵın túsinik xatlar tiyisli is qaǵazlarına rásmiylestiriledi hám olardıń tolıq atı keltiriledi.

Úlgi	Berdaq atındaǵı Qaraqalpaq mámleketlik universiteti gumanitar fakulteti dekanı J.Hákimniyazovqa 2-kurs studenti Salamat Járimbetovtıń

túsinik xatı
Men 2001-jıldıń 21-sentyabrinen 10-oktyabrge shekem bolǵan dáwirde den sawlıǵıma baylanıslı 46 saat sabaqqa qatnasa almadım.
2001.12.10. (qolı) S.Járimbetov


Tilxat - aqsha, hújjet, qımbat bahalı buyımlar yaki basqa bir nárseler alınǵanlıǵın tastıyıqlawshı rásmiy jazba hújjet.
Tilxat bir ǵana nusqada tayarlanadı hám aqsha yamasa qımbat bahalı hújjet sıyaqlı saqlanadı.
Tilxattıń tiykarǵı zárúrli bólimleri
1. Hújjettiń atı (Tilxat).
2. Tekst
a) tilxat beriwshi adamnıń lawazımı, ismi hám ákesiniń atı, familiyası~
b) aqsha, hújjet, buyım yaki basqa bir nárseni beriwshi adamnıń lawazımı, ismi, ákesiniń atı hám familiyası (zárúrli bolsa mekeme atı)~
v) aqsha, hújjet, buyım yaki basqa bir nárselerdiń atı hám muǵdarı (zárúrligi bolsa bahası).
g) qabıl etilip atırǵan buyımnıń texnikalıq jaǵdayı (eger mashina, apparatlar hám soǵan usaǵan bolsa).
3. Tilxat berilgen sáne.
4. Tilxat jazıwshınıń qolı.
Alınatuǵın aqsha muǵdarı yaki buyımnıń bahası hám onıń sanı tilxatta sanlar menen kórsetiledi hám qawıs ishinde sózler menen de berliwi shárt.
Tilxattaǵı jazıwlardı óshiriwge yamasa dúzetiwge bolmaydı, olay bolǵanda bunday hújjettiń haqıyqıylıǵı gúman tuwdırıwı múmkin.