|
ФИКРЛАШ МАСАЛАЛАРИНИ ЕЧИШ ҚОИДАЛАРИ
Мантиқ илми ҳийла «қийин» фанлар қаторига киради. Шу боис уни муваффақиятли ўзлаштиришнинг йўли олинган назарий билимларни амалий машғулотлар билан мустаҳкамлашдир. Ушбу қўлланма бу борада Сизнинг энг яқин ёрдамчингиз бўлади. Унда берилган масалаларнинг бири оддий бўлса, бошқаси чуқур фикр юритиш орқали, яна бири эса тажриба асосида ечимини топади. Тафаккур масалаларини ечиш учун эса мантиқий фикрлаш, мантиқ илми қоидаларидан хабардор бўлиш лозим бўлади.
Фикрлаш – инсоннинг аниқ далилларни кузатиб, умумий хулоса чиқаришга интилиш, воқеа-ҳодисаларнинг сабабларини аниқлаш ва келажакни олдиндан кўра билишдан бошланади.
Фикрлаш жараёнлари қуйидагича:
Аввало ҳал этилиши лозим бўлган муаммо аниқлаб олинади. Чунки муаммо бўлмаса одам ҳеч нарса ҳақида ўйламайди. Ҳал этилиши лозим бўлган масалани ечиш учун унинг моҳиятини тўла тушуниш, масала шартларини таҳлил қилиш, нима берилган ва нимани топиш кераклиги ҳақида мулоҳаза юритилади.
Масалани ечиш учун зарур бўлган билимлар (қоида, далил, қонун, теорема, таъриф) ишга солинади.
Гипотеза, яъни тахминлар ўртага ташланади, тахминлардан энг тўғриси танлаб олинади.
Масала ечилади, натижа текширилади.
Фикрлаш масалаларини ечиш, мулоҳаза юритиш орқали талабалар дунёқарашида ўзига хос хусусиятлар такомиллашади, яъни фикрнинг чуқурлиги, кенглиги, ўткирлиги, танқидийлиги, фикрлаш тезлиги ва мустақиллиги муҳим аҳамиятга эгадир.
Ақл-фаросат мураккаб назарий ва амалий муаммоларни ҳал этишдагина эмас, балки кишининг жуда оддий, одатдаги кундалик ишларида ҳам намоён бўлади. Бу жиҳатдан юнон файласуфи Демокрит ҳаётидан олинган воқеа ибратлидир. Кунларнинг бирида Демокрит жуда усталик билан боғланган катта бир бойлам ўтинни сира қийналмасдан кўтариб кетаётган йигитни учратиб қолади. Демокрит йигитдан ўтинни сочиб ташлашни ва яна илгаригидек қилиб тахлаб боғлашни илтимос қилади. Йигит унинг илтимосини бажаради ва эпчиллик билан ўтинни тахлаб боғлайди. Шунда Демокрит «Ҳой йигит, сен шунчалик зўр ақл-фаросат эгаси экансанки, юксак ишлар билан шуғулланмоғинг лозим» дейди ва уни шогирдликка олади. Кейинчалик ўтинчи йигит машҳур файласуф бўлиб етишади. У Протагор эди.
Ушбу ўқув-услубий қўлланма талабаларнинг фикрлаш фаолиятида муаммоли вазиятлар яратиш, уларда ҳамма нарсани билишга интилишини кучайтириш каби шахсий фазилатларни такомиллаштиришда ёрдам беради. Қўлланма Олий ва ўрта махсус таълим ўқув юртлари талабаларига, фалсафа, мантиқ илми билан қизиқувчиларга, шунингдек, ёш ўқитувчиларга амалий машғулотларда ўқитишнинг интерфаол усулларини қўллашда ёрдам беради.
«Мантиқ – ақл гимнастикасидир». Тўғрими?
«Улар базмда йиғловчи, уруш пайтида кулувчи, бошлиқлари ортидан ҳар йўлга борувчи, совуқ ва очликка қаноат қилувчи, урушда чидамли, дардга сабрли, тинчлик ва роҳатнинг номини ҳам билмайдиган халқдир. Барчасининг руҳонияти ва қалби бир хил, таому либосда такаллуфсиздир». Сизнингча бу қайси халқнинг ижтимоий қатлами аҳволига берилган баҳо?
IX асрнинг буюк шоири, форс-тожик мумтоз шеъриятининг асосчиси Абу Абдуллоҳ Рудакий (884-954)нинг шеърлари юксак инсонийлик, доҳиёна тафаккур, туйғулар тозалиги, халқона соддалик, маънавият руҳи, нурли таровати билан кишини мафтун қилади. Унинг ушбу чистони ҳам фикримизнинг ёрқин далилидир:
Қулоқсиз эшитар, чўлоқдир тез юрар,
Тилсиздир гапирар, кўзи йўқдир кўрар.
Қилич каби ўткир, юриши илондек,
Чеҳраси қайғули, ошиқларга ўхшар.
Абу Абдуллоҳ Рудакийнинг ушбу тўртлигида нима таърифланган?
А., Б., С., Д., Ж. исмли кишилар бир-бирлари билан боғлиқ ҳолда ишлайдилар. Агар А. режани бажарса, Б. ҳам бажаради. Агар Б. бажарса С., C. бажарса Д., Д. бажарса, Ж. режани бажаради. С. режани бажармади. Улардан қайси бирлари режани бажарган бўлиши мумкин?
Футболчилар командаси 11 кишидан иборат бўлиб, уларнинг ўртача ёши 22 га тенг. Ўйин пайтида бир футболчи шикастланиб, ўйиндан чиқиб кетди. Қолган ўйинчиларнинг ўртача ёшлари 21 га тенг бўлди. Ўйиндан чиқиб кетган футболчи неча ёшда бўлган бўлиши мумкин?
Экилган экин орасига от билан кирган киши нотўғри иш қилганини тушуниб, экинга зарар етказмаган ҳолда қандай қилиб экинзордан чиқиб кетиши мумкин?
Дунёда шундай шаҳар борки, уч революцияни бошидан кечирган, унинг қиши қисқа, ёз фаслида эса кечаси чироқ ёқмасдан ҳам газета ўқиш мумкин. Шимолда унга тенг келадиган шаҳар йўқ. Бу қайси шаҳар?
Тасаввур қилинг. Ҳавони булут қоплаб, ёмғир қуя бошлади, лекин ёғаётган ёмғирнинг шовқини бор бўлса-да, бирор томчиси ерга тушмади. Ер қуп-қуруқ турибди. Қандай қилиб?
Уч оға-инига ўн еттита от мерос қолибди. Ота ўз васиятида отларнинг ярмини катта ўғлига, учдан бир қисмини ўртанча ўғлига, тўққиздан бир қисмини кичик ўғлига деб тақсимлаб берган эди. Ўғиллар меросни бўлиша олмабдилар. Қози эса меросни бир зумда ҳал қилибди. Қози қандай тадбир ўйлаб топган?
Аббосийлар халифаси Маъмун ар-Рашид (833 йилда вафот этган) айтган экан: «Шомнинг кўзи – Дамашқ, Румнинг кўзи – Кустантана, Ироқнинг кўзи – Бағдод, Мовароуннаҳрнинг кўзи – …». Халифа қайси шаҳарни Мовароуннаҳрнинг кўзи деб айтган бўлиши мумкин?
Нима учун «кўз билан кўрган юз марта эшитгандан афзал»?
Кўча қоидасини бузганлиги учун бир неча кишини ушлаб турган инспектор уларни рост гапиришга ундаб, «агар қоидабузар рост гапирса минг сўм, агар ёлғон гапирса уч минг сўм жарима оламан» деган шарт қўйди. Бундай пайтда бирорта қоидабузар жаримадан қутулиб қолиши мумкинми?
Нима учун «қари билганни пари билмас?»
Суд олдида уч киши турибди. Улардан ҳар бири жиноятчи ёки жиноятчи эмас. Судья жиноятчи доимо ёлғон гапиришини, жиноят содир этмаган киши рост гапиришини билган ҳолда бу уч кишининг қайси бири жиноятчи-ю, жиноятчи эмаслигини билмасди. Судья тажрибасини ишга солиб биринчи кишини сўроқ қилиб кўрди. Қолган кишилардан «Биринчи сўроқ қилинган ўзини жиноятчиман, деб тан олдими?» деб сўради. Иккинчи киши «Жиноятчиман деб тан олди» деди. Учинчи киши «Жиноятчиман деб тан олмади» деди. Сизнингча иккинчи ва учинчи судланувчилардан қайси бири жиноятчи эмас?
Бунга нимани жойлаштирса бўлади?
Еттита бир хил олмани саккиз кишига тенг бўлиш учун нима қилиш керак?
Бир тушунча бир вақтда ҳам тўғри, ҳам нотўғри бўлиши мумкинми?
Бир сигир ҳар йилнинг бошида бир бузоқ туғади. Агар бузоқ ҳаётининг ҳар тўртинчи йилидан бошлаб худди онаси каби ҳар йили йилнинг бошида биттадан бузоқласа, 20 йилда сигирларнинг умумий сони нечта бошга етади?
Қадимда жиноят қилган кишилар учун турли қонунлар ўйлаб топишган. Бир мамлакат подшоси антиқа жазо усулини кашф қилган ва кўп жиноятчилар жазодан озод бўлиб, қутулиб кетганлар. Подшо қандай усул қўллаган бўлиши мумкин?
Сўзларнинг омонимини топинг:
Do'stlaringiz bilan baham: |
