Azərbaycan ortopediya və travmatologiya jurnali

SÜMÜKLƏRİN ÇOXSAYLI VƏ MÜŞTƏRƏK ZƏDƏLƏNMƏLƏRİNİN CƏRRAHİ MÜALİCƏSİNDƏ YENİ TEXNOLOGİYALARIN TƏTBİQİ
BUD SÜMÜYÜNÜN DİAFİZİNİN QƏLPƏLİ SINIQLARI ZAMANI KİLİDLƏNƏN ÇİVİLƏRLƏ OSTEOSİNTEZ ÜSULUNUN
TƏTBİQİNİN NƏTİCƏLƏRİ
Q.S.Canbaxışov
Elmi-tədqiqat travmatologiya və ortopediya institutu, Bakı
Açar sözlər: bud sümüyü, sınıq, kilidlənən çivi, osteosintez.
Ключевые слова: бедренный кость, перелом, блокирующий штифт, остеосинтез.
Key words: femur bone, fracture, blocking pin osteosynthesis.
Bud sümüyünün diafizinin sınıqları yüksək enerjili travmalar nəticəsində baş verir və müxtəlif müalicə üsulların mövcud olmasına baxmayaraq yüksək faiz əlilliklə nəticələndiyindən belə sınıqların müalicəsi travmatologiyanın aktual problemi olaraq qalmaqdadır.
Bud sümüyünün diafizar sınıqları zamanı osteosintez üsulu ilk dəfə 1939-cu ildə G.Kuntcher tərəfindən təklif edilmiş və praktik cərrahiyyədə geniş tətbiq edilməyə başlamışdır [1, 2].
Bud sümüyünün qəlpəli sınıqları zamanı G.Kuntcher çivilərinin tətbiqi zamanı distal fraqmentin rotasiyasının qarşısını almaq, müalicə dövründə stabil fiksasiyanı təmin etmək məqsədilə 1985-ci ildən başlayaraq çivilərin kilidləmə prinsipindən istifadə edilməsinə başlanmışdır ki, bu da bir çox fəsadların qarşısının alınmasında travmatologiyada mütərəqqi bir addım olmuşdur [3, 4].
Material və metodlar
ETTOİ-nun kəskin travmatologiya şöbəsində 2013-2016-cı illərdə bizim müşahidəmiz altında 77 xəstə olmuşdur. Xəstələrin yaşı 18-83 arasında olmuşdur. Onlardan 53 nəfər kişi, 24-ü isə qadın olmuşdur. Lokalizasiyasına görə sınıqlar 12 nəfərdə budun yuxarı 1/3-də, 51-də orta 1/3-də, 14-də isə aşağı 1/3-də müşahidə edilmişdir. Travmanın mexanizminə görə 61 nəfərdə sınıqlar avtomobil qəzası, 7-də hündürlükdən yıxılma, 9-da isə məişət travması nəticəsində baş vermişdir. Xəstələrin 4 nəfərində hər iki budların sınıqları,3-də isə iki səviyyədə müşahidə edilmişdir. Beləliklə, cəmi 81 bud sümüyü sınıqları qeyd edilmişdir.