Arxitektura va qurilish materiallari

Yedirilishga (yemirilishga) mustahkamlik. Gidrotexnik inshootlar betonlari suvdagi muallaq qo'shimchalar (mayda va yirik zarrali loyqasimon aralashmalar) ta'sirida yedirilishga uchraydi.

Birinchi navbatda, betonning nisbatan kam mustahkamlikka ega bo'lgan qismi, sement toshi yemiriladi. Odatda, gidrotexnik betonni tayyorlashda qo'llaniladigan yirik to'ldiruvchining mustahkamligi betonning mustah-kamligidan bir necha marta katta bo'ladi, shuning uchun inshootning suv oqimi ta'sirida yemirilgan qismlari betonlari g'adir-budur, yirik to'ldiruvchisi ko'rinib qolgan bo'ladi. O'z navbatida, inshootlarning suv oqimi kuchli bo'lgan qismlarida, shu chiqib qolgan toshlar qarshiligidan yemirilish jarayoni yanada kuchayadi. Yedirilishga chidamlilikni oshirish maqsadida inshootlarning suv tez oqadigan qismlarida (to'g'onlardan suv oqib tushish qismlari, inshoot suv urilish qismlari, tezoqarlar va h.k.) betonning yedirilishiga qarshi chora-tadbirlar qo'llaniladi. Inshootning suv tez oqar qismlarini qurishda betonni zichlash uchun, odatdagi tadbirlardan tashqari, vakuumlash qo'llaniladi. Beton qorishmasini tayyorlashda yuqori markadagi sement va cho'yan yoki po'lat sochmalar (qirindi) qo'llaniladi, quyilgan sirtlar yaxshilab silliqlanadi.