Ангренда ўтган сайёр судда 6 нафар маҳкум жазодан муддатидан олдин озод этилди

Ангренда ўтган сайёр судда 6 нафар маҳкум жазодан муддатидан олдин озод этилди
Ангрен шаҳридаги “Кимёгар” маҳалласида жиноят ишлари бўйича шаҳар суди томонидан очиқ сайёр суд мажлиси бўлиб ўтди. Тадбир аввалида суд раиси Р.Раҳимжонов томонидан мамлакатимиз суд-ҳуқуқ тизимида кечаётган ислоҳотлар, хусусан, маҳкумлар ҳуқуқларининг сўзсиз таъминланиши, шаъни ва қадр-қимматининг ҳурмат қилиниши, умумэътироф этилган халқаро стандартларга мос равишда маҳкумлар ҳуқуқлари доирасини янада кенгайтириш бўйича қилинаётган ишлар тўғрисида тушунтириш берди.
Шунингдек, шаҳар ички ишлар бўлими пробация хизмати масъуллари томонидан озодликдан маҳрум қилиш билан боғлиқ бўлмаган жазоларни ўтаётган фуқароларни иш билан таъминлаш, касбга ўргатиш, маънан соғлом ҳаётга йўналтириш, ижтимоий мослаштириш, қайта жиноят содир этилишининг олдини олишга оид ишлар тилга олинди.
Шундан сўнг сайёр суд ўтказилиб, унда 6 нафар маҳкумга нисбатан инсонпарварлик далолатномалари кўриб чиқилди ва улар жазодан муддатидан илгари шартли равишда озод қилинди. Ўз навбатида суд раиси томонидан жазони ўтаётганлар суд белгилаган чекловлар ҳамда қонун талабларига қатъий бўйсуниши лозимлиги уқтирилди.
Шунингдек, тадбир давомида Ўзбекистон Республикаси Конституциясига киритилаётган ўзгартиришлар, яқинлашиб келаётган муҳим сиёсий жараён, яъни жорий йилнинг 30 апрель куни ўтказилиши кутилаётган умумхалқ референдумининг аҳамияти хусусида ҳам иштирокчиларга ҳуқуқий тушунтиришлар берилди.