Амалий машғулот фибролит ҳусуссиятлари, ишлатилиши

14-АМАЛИЙ МАШҒУЛОТ


Фибролит ҳусуссиятлари, ишлатилиши.
Амалий ишнинг мақсади: Фибролит тўғрисидаги маълумотларни ўрганиш.

Фибролит – бу ўтган асрнинг 20-йиллари охирида ўзи ҳақида маълум қилган қурилиш материалидир. Фибролит арболитнинг аналоги ҳисобланади. Уни цемент, сув ва узунлиги ярим метр ва ундан ортиқ бўлган ёғоч қириндисидан (лентаси) тайёрланади. Ёғоч лентаси туфайли фибролит эгилишда ва сиқилишда юқори мустаҳкамлик характеристикасига эришади. Ёғоч ленталар суюқ шиша ёки хлорланган калций аралашмаси билан шимдирилади. Тайёр бўлган хомашё қолипларга солиниб, прессланади, қуритилади ва фибролит маҳсулотлари олинади. Материалнинг ўртача зичлиги 0,25 дан 0,5 т/м³ гачани ташкил этади.

Фибролит плитаси
Давлат стандартининг амалдаги нормаларига мувофиқ ишлаб чиқарилаётган фибролит плиталар қуйидаги ўлчамларда бўлади: узунлиги – 2400 ва 3000 мм, эни 600 ва 1200 мм, қалинлиги – 30, 50, 75, 100, 150 мм.
Фибролит плиталари зичлиги бўйича қуруқ ҳолатда учта маркага бўлинади:

Плита маркаси	Қуруқ ҳолатдаги плиталар зичлиги, кг/м3	Қўлланилиш соҳаси
Ф-300	250....350	Иссиқлик изоляцион материал сифатида
Ф-400	351....450	Иссиқлик изоляцион-конструктив ва товуш изоляцион материаллар сифатида
Ф-500	451....500	худди шундай

Қурилишда фибролит плиталари иссиқлик изоляцион, конструктив-иссиқлик изоляцион ва акустик материал сифатида қўлланилади. Шунингдек, фибролит плиталарни нисбий намлиги 75% дан юқори бўлмаган хоналарда қўлланилишига рухсат берилади.
Фибролитнинг қўлланилиши.
Фибролит монолит уй-жой қурилишида пойдеворлар учун ечиб олинадиган опалубка вазифасини бажаришда кенг қўлланилади. Фибролитларни қурилишда бундай усулда қўлланилиши осон, тез ва арзонлиги билан ажралиб туради. Уларни ўрнатишда хеч қандай оғир техникага хожат қолмайди. Материалнинг стандарт ўлчамлари ва вазнининг енгиллиги уни қурилиш жараёнида технологиклигини таъминлайди. Фибролитларга ёғоч материаллар каби осон ишлов берилади.

Фибролитларни ечиб олинадиган опалубка сифатида қўлланилиши

Бундан ташқари, фибролитни совуқ температураларда ҳам қўллаш мумкин. Унинг иссиқлик изоляцияловчи хоссалари туфайли бетонни иситишга кетадиган харажатларни камайтиради ва қиш шароитида бинони бутун девори бўйлаб бетонни қуйиш имконини беради.
Фибролит плиталари яхши товуш изоляцияловчи хоссаларга ҳам эгадир. Масалан уларни пол конструкцияларини ётқизиш учун қўлланилганда 20 дБ гача бўлган шоқинни изоляциялаш мумкин.
Замонавий фибролитлар юқори намга чидамлилиги туфайли уларни масалан 75% намлиги бўлган хоналарда фойдаланиш имконини беради. Уларни шунингдек, каркассиз хоналар пардеворларини тиклашда, биноларнинг том қисмларини иссиқлик изоляциялашда ва бино деворларини қуришда қўллаш мумкин.
Фибролитларнинг ютуқлари билан бир қаторда айрим камчиликлари ҳам мавжуддир.
1. Нам температура, об-ҳавонинг иссиб-совуши натижасида фибролитнинг таркиби бузилиши ва иссиқлик изоляцияловчи хоссалари пасайиши мумкин.
2. Материал эски технология асосида тайёрланиши оқибатида нам шароитда унга замбуруғли касалликлар таъсир этиши мумкин.
3. Унинг вазни ёғоч вазнидан 20% га оғирдир, бироқ бетонга нисбатан 4 маротаба енгил бўлганлиги учун қурилишда уларни қўллашда оғир техникага хожат қолмайди.