Allayarov A. I. O’rmonov H. B. O‘zbekistondagi ziyoratgoh obidalar

Kabudon tarixi va uning “lokalizatsiyasi” fanda hanuz echimini kutayotgan ilmiy muammodir. Xitoy yilnomalarida Kabudon (o‘rta Sao) Ishtixondan sharqda, Samarqanddan shimolda joylashganligi yozib qoldirilgan. Ayni paytda Kabudonni ba’zi mutaxassislar (H. Axunbabaev, B.G‘ayibovlar) hozirgi Jomboy, Bulung‘ur tumanlari hududida joylashgan deb hisoblaydilar. Bu holatda uning joylashgan o‘rni Samarqandga nisbatan sharq yoki shimoli sharqda bo‘ladi, Qang‘ bilan chegaradoshligi yo‘qqa chiqadi, chunki o‘rtada Nurota tog‘lari mavjud. Kabudonning o‘zagi “kabud” bo‘lganligini, Qang‘ bilan uni chegara zonasida Samarqandga nisbatan shimolda joylashganligini, bog‘-rog‘larining ko‘pligini hisobga oladigan bo‘lsak bu hokimlik hududini o‘rta Nurotaning shimoliy etaklaridagi mashhur va tarixiy Bog‘don qishlog‘i va uning atrofida bo‘lgan, deb e’tirof etish lozim. Bog‘don va uning atrofidagi madaniy vohada saqlanib qolgan o‘nlab shahar va qishloqlarning 65-70 foizini davriy sanasi ilk o‘rta asrlar (V-VIII) bilan davrlanadi.