Allayarov A. I. O’rmonov H. B. O‘zbekistondagi ziyoratgoh obidalar

G‘avsuli Аʼzam maqbarasi. G‘avsuli Аʼzam Аbu Muhammad Muyiddin Sayyid Аbdulqodir G‘iloniy Hazratlari 1079 yilda Eronning G‘ilon viloyatida tavallud topadi. U 1166 yilda Bog‘dodda vafot etgan. Аbdulqodir G‘iloniy valiylik martabasiga erishgan zotdir. Maʼlumki, avliyolar yetti darajada bo‘lishgan. Ularning oliy darajasi «Qutb va G‘avs»dir.

Sayyid Аbdulqodir G‘iloniy ana shunday Qutbi Аʼzam, «Shayxi Mashriq» oliy darajali sharafga egadir. Barcha Yulduzlar oyning o‘n to‘rtinchi kechasi shohning atrofida uning g‘ulomlaridek o‘tirishgani kabi, jami buzrukvorlar u zot atrofida o‘tirishib, u kishining xizmati va mulozamatlariga tayyor turishar ekan.

Shu sabab Hazrat o‘n to‘rt qutb-g‘avsning biridir. «G‘avs» - qo‘llovchi dastgir; «Аʼzam” esa ulug‘ demakdir.

Hazrat G‘avsuli Аʼzam Аbu Muxammad Muyiddin Sayyid Аbdulqodir G‘iloniy nasl-nasablari o‘n avlod bilan Muxammad alayhissalomning qizlari Fotimai Zuhro va uning o‘g‘illari imom Hasan va imom Xusanga borib taqaladi. Ota tarafidan imom Hasanga, onalari tarafidan imom Husanga borib tutashadi. Аbdulqodir G‘iloniy yoshligidan ulug‘ martabalarga erishgan. U o‘n olti yoshida Bog‘dodga borib, o‘z davrining buyuk allomalaridan saboq oladi. Keyinchalik o‘zi Bog‘dod madrasalarida mudarrislik qiladi.