Қаймоқ сифатини текшириш

ҚАЙМОҚ СИФАТИНИ ТЕКШИРИШ

Ишни олиб боришдан мақсад: Қаймоқ турлари ва унинг олиниш усуллари билан талабаларни таништириш.
Иш давомида талаба қуйидагиларни билиши ва бажариши шарт: Қаймоқ сифатини органолептик ва физик-кимёвий усуллар орқали аниқлашни билиш.
Ишнинг мазмуни

1. 
   Қаймоқ сифатига органолептик жиҳатдан баҳо бериш.
   
2. 
   Қаймоқ таркибидаги сахароза миқдорини аниқлаш.
   
3. 
   Қаймоқ таркибидаги кислоталиликни аниқлаш.
   
4. 
   Қаймоқ таркибидаги ёг миқдорини аниқлаш.
   
5. 
   Қаймоқнинг ифлосланиш даражасини аниқлаш.
   

Қаймоқ сифатига органолептик жиҳатдан баҳо бериш.
Органолептик жиҳатдан текшириш сезги органлари воситасида олиб борилади.
Бу усул билан қаймоқнинг ташқи кўриниши текширилади; унинг ранги,
таъми, ҳиди ва консистенцияси аниқланади.
Ишнинг бориши
Қаймоқнинг ташқи кўринишини текшириш. Қаймоққа органолептик жиҳатдан баҳо беришда унинг идишини кўздан кечириш билан бошланади. Бунинг учун идишнинг стандарт талабига жавоб бериши текширилади; идиш четидан қуйиб қолиш ҳолати кузатилади; идишнинг қаймоқ билан тўлалиги аниқланади.
Стандарт талабига кўра, идишдаги қаймоқнинг ташқи кўриниши тоза, четларидан қаймоқ оқмаган, идиш оғзи маҳкам ёпилган; идиши металдан бўлса пачоқланмаган, шиша идишда бўлса дарз кетмаган, четлари учмаган бўлиши лозим.
Қаймоқнинг рангини аниқлаш. Қаймоқнинг рангини аниқлаш учун қаймоқ тоза ва қуруқ шиша идишга қуйилади. Табиий ёруғликда унинг ранги аниқланади.
Қаймоқ таркибидаги ёғ миқдорига қараб оқ, кўкишроқ, сарғишроқ-оқ рангли бўлиши мумкин. қаймоқнинг таъм ва ҳидини аниқлаш. Қаймоқ таъмини аниқлашдан олдин идишдаги қаймоқ яхшилаб аралаштирилади. Махсус идиш ёки кимёвий стаканга қуйилади ва ичиб қўриш орқали таъм ва ҳиди аниқланади.
Қаймоқ таъми сал ширинроқ, сут маҳсулотига хос ҳидга, бегона таъм ва ҳидсиз бўлиши керак. Қаймоқнинг консистенциясини аниқлаш. Қаймоқ қонсистенциясини аниқлашда унинг бир жинслигига, яъни идиш тубида чўкма бор ёки йўқлигига, қаймоқ ёғининг бир текистда тарқалганлигига эътибор берилади.
Қаймоқнинг консистенциясини аниқлаш учун тоза кимёвий стакан олинади. Стаканга қаймоқ бир меъёрда қуйилади ва бир жинслилиги кузатилади.
Қаймоқнинг консистенцияси қуюқ, бир жинсли бўлиши керак.