Адренергик синапсларни қамалловчи воситалар

Адренергик синапсларни қамалловчи воситалар.

Адренергик синапсларни қамалловчи воситалар икки гуруҳга бўлиб ўрганиб чиқилади:
1) адреноблокаторлар (адренорецепторларни қамаллайди) ва
2) симпатолитиклар (симпатик нерв охирларидан норадреналин ажралишини сусайтиради).
Адреноблокаторлар турли типдаги адренорецепторларга таъсир этиш йўналишига кўра уч гуруҳга ажратилади: α-, β- ва α, β-адреноблокаторлар. Гуруҳлар эса α-адренорецепторларнинг қуйи типларига (α₁ ва α₂) таъсир этишига кўра α-адреноблокаторлар ҳамда β-адренорецепторларнинг қуйи типларига (β₁ ва β₂) таъсир кўрсатиши бўйича β-адреноблокаторларга бўлинади (классификацияга қаранг).
Адреноблокаторларнинг артериал гипертензияда қон босимини пасайтириш α-, β- ва α, β-адреноблокаторлар), простата безининг яхши сифатли гиперплазиясида пешоб ажралишини яхшилаш (α₁- адреноблокаторлар), стенокардияда юрак ишини ҳамда миокарднинг кислородга бўлган эҳтиёжини камайтириш (β₁, β₂- ва β₁- адреноблокаторлар), тахиаритмия ва экстрасистолияларда юрак қисқаришларининг нормал ритмини тиклаш (β₁, β₂- ва β₁- адреноблокаторлар) каби хусусиятлари катта амалий аҳамиятга эга.
Симпатолитиклар эса гипертония касаллигини тизимли даволашда қўлланилади.
Адренергик синапсларни қамалловчи дори воситаларининг классификацияси
А. АДРЕНОБЛОКАТОР ВОСИТАЛАР

1. 
   α-Адреноблокаторлар:
   

Фентоламин (α₁, α₂), Тропафен (α₁, α₂), Дигидроэрготоксин (α₁, α₂), Празозин (α₁), Тамсулозин (α₁).

2. 
   β-Адреноблокаторлар:
   

Анаприлин (β₁, β₂), Окспренолол (β₁, β₂), Метопролол (β₁), Талинолол (β₁), Атенолол (β₁), Бисопролол (β₁)

3. 
   α, β-Адреноблокаторлар:
   

Лабеталол (β₁, β₂, α₁), Карведилол (β₁, β₂, α₁)
Б. СИМПАТОЛИТИК ВОСИТАЛАР
Резерпин. Октадин.

8. Расм. Адреналин ва фентоламиннинг артериал босимга таъсири:
чапда — қурилма схемаси; ўнгда — адреналин ҳамда фентоламин таъсири фонида адреналин киритилганидан сўнгра артериал босимнинг қайд этилиши.