Адҳам ваисов

Умумий даво – Acyclovir (Zovirax, Virolex,Valtrex).
ҚАМРАБ ОЛУВЧИ ТЕМИРАТКИ (Herpes zoster)

Қамраб олувчи темираткини фильтрланувчи вирус чақиради. Ҳар иккала жинсда ҳам учраб, ҳар хил ёшларда кузатилади, аммо 10 ёшгача бўлган болаларда учрамайди.

Касаллик ўткир кечиб, қаттиқ невралгик оғриқлар билан кузатилади ва тана ҳарорати ҳам кўтарилади.
Клиникаси. Асосан периферик нерв толалари бир томонлама жароҳатланади, кўпинча қовурғалараро нерв жароҳатланиб, нерв толалари йўналиши бўйича тошма тошиб, оғриқ безовта қилади.
Учламчи нервнинг биринчи ва учинчи шохи жароҳатланса оғиз шиллиқ пардасида тошмалар тошиши кузатилади. Тошмалар хуруж-хуруж қилгандай тошади, улар пайдо бўлгач, ҳарорат кўтарилади. Ги­пе­ремияланган тери юзасида гуруҳ-гуруҳ пуфакчалар пайдо бўлиб, улар дастлаб сероз суюқлик сақлайди, аста-секин суюқлик лойқа­ланади, қуриб сероз қалоқ ҳосил қилади. Дастлабки гуруҳ тошмаларидан сўнг навбатдаги гуруҳ тошмалар пайдо бўлиб, нерв толаси йўналишини қоплайди. Тошмалар бир вақтда тошмайди, шу сабаб бир беморда ҳар хил тошма: эритема, пуфакча, сероз қалоқлар, эрозиялар кузатилади, эрозиялар чети майда гажимдор. Қалоқлар кўчиб, эрозия битгач, ўрнида иккиламчи доғ ҳосил бўлади.
Қамраб олувчи темиратки ўзидан сўнг иммунитет қолдиради, қайталаши кузатилмайди. Аммо оғир касалликлар билан оғриган кишиларда, иммунитет сусайиши ( рак, лейкоз) қайталаш ва тарқоқ тури кузатилиши мумкин. Айрим беморларда касалликдан сўнг невралгик оғриқ узоқ вақт сақланиши мумкин.
Давоси.

• 
  Анальгетиклар (аналгин, баралгин);
  
• 
  Ацетилсалицил кислотаси ёки амидопирин 0,5г дан кунига 3-4 марта ;
  
• 
  Антибиотиклар (рифампицин 0,6г);
  
• 
  Витаминлар В12 – 500 м/о ҳар куни ;
  
• 
  Маҳаллий анилин бўёқларининг спиртдаги эритмалари, вирусга қарши таъсирга эга воситалар сақловчи мазлар (акловир 5%, теброфен 2%, оксалин 3%);
  
• 
  УБН, ультратовуш, диадинамик ток – нерв йўналиши бўйича;