Adabiyotimizda katta voqea

ADABIYOTIMIZDA KATTA VOQEA
Biz ijodkorlarimiz hayoti va faoliyati, bolalar adiblari haqida ma’lumot beruvchi, ularning asarlaridan parchalar keltirilgan antologiyalarni ko‘rganmiz, o‘qiganmiz. Lekin qo‘lingizdagi “O‘qish kitobi adiblari” bu borada o‘ziga xoz yangilik. Ushbu kitob katta mehnat va izlanishlar natijasida yuzaga kelgan, desak mubolag‘a bo‘lmaydi.

Bir kuni Buxoro shahridagi 3-maktab o‘qituvchisi menga qo‘ng‘iroq qilib qoldi: – Opa, 4-sinf o‘qish kitobida sizning “Saboq” nomli hikoyangiz berilgan ekan. Hikoyani o‘qishdan oldin, o‘quvchilarni uning muallifi bilan tanishtirmoqchi edim. Iltimos, menga hayotingiz, adabiyotga kirib kelishingiz, ilk asaringiz haqida qisqa gapirib bersangiz. Bu o‘quvchilarim uchun qiziqarli bo‘lardi, – dedi muallim.

Darhaqiqat, odatda “O‘qish kitobi” mualliflari bolalar gazeta-jurnallarini o‘qib-o‘rganib o‘quvchining yoshiga, tasavvuriga, mavzusiga qarab ertak, she’rlar tanlaydi. Ular uchun yozuvchining shaxsi unchalik muhim emas. Asosiysi, bo‘lim mavzusiga mosligi. Shu bois darsliklardan elga mashhur shoir-yozuvchilardan tashqari, nomi hali unchalik tanilmagan mualliflarning asarlari ham joy olgan. Ana shu mualliflarni o‘quvchiga tanishtirishda ushbu kitob boshlang‘ich sinf o‘qituvchilari uchun zarur manba, qo‘llanmadir.

Qo‘llanmaning yana bir muhim jihati, mualliflarning asari qaysi sinf darsligidan joy olganligi ko‘rsatilgani, uning ijodidan namunalar berilganidir.

Bir qarashda oddoy kitob. Lekin qariyb 150 nafar adibning hayoti haqida ma’lumot yig‘ish, asarlaridan parcha tanlash oson emas. Bolalar darslikdagi ijodkorlarning she’r va hikoyasini o‘qir ekan, uning qiyofasini ko‘rishga ham qiziqadi. Mualliflar ancha izlanishlar evaziga bu ishni ham uddalashdi. Kitobda aksariyat ijodkorlarning suratlari ham berilgan.

Ushbu kitob o‘quvchilarimizga uzoq yillar davomida tayyor dastyor – metodik qo‘llanma bo‘ladi, degan umiddamiz. Kelgusida bunday xayrli ish yanada to‘ldirilgan, boyitilgan holda davom etishiga ishonamiz.

Zahro HASANOVA,

“Gulxan” jurnali bosh muharriri

Muhabbat HAMIDOVA, yozuvchi.