Adabiyot Abituriyentlar uchun 3-qism mustaqillik davri o‘zbek adabiyoti

Olimjon:— (Alomatga qarab turib.) E, bu o‘chib qopti-ku. (Alomatning yelkasidagi blokni kavlashtira boshlaydi.)
Qo‘chqor: — Iye, o‘chib qopti, deganing nimasi? Men shuncha gapni kimga gapirdim bo‘lmasam! Butun o‘zbekning dardini dasturxon qilib o‘tiribman. Doim shu, bizga o‘xshagan odam gapirsa, yo hech kim eshitmaydi, yo eshitadigani temir chiqadi…
Olimjon:— Shu blokni almashtirish kerak ekan-da, qayerdadir kontakt bo‘lmayapti.
Qo‘chqor: — Nima-takt?
Olimjon:— Kontakt. O‘qtin-o‘qtin tutib qolayapti. (Boshqa sxema o‘rnatadi.)
Alomat:— (Noz bilan.)Unaqa qaramang odamga… Biram nigohingiz o‘tkirki!
Qo‘chqor: — (Dovdirab.) Kim. Menmi?.. Yo‘q… Qaraganim yo‘q… Men tomga qarayapman…
Alomat:— Doim shunaqa deysiz, odamni xijolat qilib qo‘yib… Yomonsiz, Qo‘chqor aka…
Qo‘chqor: — (Jonholatda.) Shunisini qo‘y, Olimtoy, shunisini qo‘y, uka! O‘chirma, o‘chirma!.. Alomatxon!.. Gapiring, Alomatxon!.. Shunaqa gaplaringizdan gapiring…
Alomat:— Voy, anavi kishimni… Nima deyman?
Qo‘chqor: — Mayli nima desangiz ham, Alomatxon!.. Ishqilib, ovozingizni eshitsam bo‘ldi!..
Alomat:— E, boring-e…
Qo‘chqor: — Olimtoy! Sen dahosan! Yaratib qo‘yganingdan aylanay! Endi mundoq o‘tir.
Olimjon:— (O‘tirib.) Xo‘sh?
Qo‘chqor: — Olimtoy, jigarim! Gap mundoq… Shu… (Alomatga qarab qo‘yib.) Alomatxonning oldilarida noqulayroq bo‘layapti-ku, a?
Olimjon:— Unda o‘chirib qo‘yamiz. (Robotni o‘chiradi.) Gapiravering. (Qo‘chqor o‘chdimi-yo‘qmi deb Alomatga tikiladi, keyin uning ko‘zi oldida qo‘lini uyoqdan-buyoqqa o‘ynatib ko‘radi. Alomat tek qotib turaveradi.)
Qo‘chqor: — Gap mundoq, Olimtoy, ukammisan?
Olimjon:— Albatta.
Qo‘chqor: — Qiyomatlik ukammisan?
Olimjon:— Ha.
Qo‘chqor: — Agar qiyomatlik aka-uka bo‘lsak… (Alomatga qarab qo‘yib.) Eshitmaydi-a?