A qodiriy nomidagi jizzax davlat pedagogika instituti tarix fakulteti

Davlat mustaqilligi ramzlari-davlatning timsollari, uning suverenitetini, milliy va iqtisodiy ko‘rsatkichlarini, siyosiy-ijtimoiy tuzumini, asosiy mafkura va hayot qoidalarini ko‘rsatuvchi belgilar, eng muhim xujjatlar, g‘oyalar va tushunchalar.
Davlat ramzi-bu mustaqil davlat belgisidir. U davlat bayrog‘i, davlat gimni, davlat gerbi, mamlakat milliy valyutasi va mamlakat konstitutsiyasida o‘z ifodasini topadi.
Davlat gerbi-davlatning rasmiy emblemasi bo‘lgan farqlovchi belgisi; bayroq, pul belgilari, muhrlar va ba’zi bir rasmiy hujjatlarda aks ettiriladi. Davlat gerbining mazmuni konstitutsiya yoki maxsus qonun bilan belgilanadi. O‘zbekiston Respublikasining Konstitutsiyasiga binoan, Davlat gerbi Oliy Kengashning 1992 yil 2 iyul kuni bo‘lgan X sessiyasida “O‘zbekiston Respublikasining Davlat gerbi to‘g‘risida”gi qonunni qabul qilish bilan tasdiqlangan.
Davlat madhiyasi (yunoncha hymnos-tantanali qo‘shiq)-Vatanni, davlatni, tarixiy voqealarni, ularning qahramonlarini ulug‘lovchi she’riy-musiqiy asar, davlatning ramzlaridan biri. O‘zbekiston Respublikasi Konstitutsiyasining 5-moddasiga binoan, O‘zbekiston Respublikasining Davlat madhiyasi uning tasvirlanishi va rasmiy qo‘llanilish tartibi qonun bilan belgilanadi. “O‘zbekiston Respublikasining davlat madhiyasi to‘g‘risida” gi qonuni 1992 yil 10 dekabrda qabul qilingan.
Davlat tili-davlat aholisi ko‘pchiligi yoki asosiy qismining ushbu davlatda Konstitutsiya asosida davlat tili sifatida belgilangan tili. O‘zbekiston Respublikasining Konstitutsiyasi 4-moddasiga muvofiq, O‘zbekiston Respublikasining butun hududida o‘zbek tili davlat tilidir. Davlat tili O‘zbekiston Respublikasining davlat hokimiyati organlarida, mahalliy o‘zini-o‘zi boshqarish organlarida, davlat muassasalarida asosiy til sifatida ishlatiladi. Davlat tilidan foydalanish va uni qo‘llash tartibi 1989 yil 21 oktyabrda qabul qilingan va 1995 yil 21 dekabrda o‘zgartirish va qo‘shimchalar kiritilgan “O‘zbekiston Respublikasining davlat tili to‘g‘risida”gi qonuni bilan tartibga solinadi.