9-амалиёт машғулоти Станция йўлларини рақамлаш тартиби, йўлларни йўналишини белгилаш, чегара қозиқчалари, стик ва светафорларни жойлаштириш

9-амалиёт машғулоти
Станция йўлларини рақамлаш тартиби, йўлларни йўналишини белгилаш, чегара қозиқчалари, стик ва светафорларни жойлаштириш.
Амалиёт машғулоти бажаришдан мақсад: Талабаларга Станция йўлларини рақамлаш тартиби, йўлларни йўналишини белгилаш, чегара қозиқчалари, стык ва светафорларни жойлаштиришни ўргатиш.
Станцияларда икки хил турдаги йўллар фарқланади: станция йўллари ва махсус вазифали йўллар.
Станция йўлларига станция чегараси ичида жойлашган – бош, қабул-жўнатиш, саралаш, тортиш, ортиш-тушириш, депо (локомотив ва вагон хўжаликлари), боғловчи ва бошқа йўллар киради. Махсус вазифали йўлларга эҳтиёт ва тутиб қолувчи берк йўллар ҳамда корхоналарга олиб борувчи шохобча йўллар киради.
Эҳтиёт берк йўллар ҳаракатланувчи таркибларнинг тасодиф ва эҳтиётсиз ҳаракат сабабли поездларнинг юриш йўлларига чиқиб кетишдан сақлайди. Тутиб қолувчи берк йўллар эса станцияга туташган сурункали қияликдан бошқарувини йўқотиб келаётган поезд ёки алоҳида вагонларни станцияга киритмай тутиб қолиш учун перегон томонидан қўйилиб меёрий талабларга биноан биринчи стрелка шу берк йўлга тайёрлаб қўйилади.
Станцияларда бир хил ишларни бажариш учун мўлжалланган йўллар парк деб аталувчи алоҳида йўл гуруҳларига бирлаштирилади. Ўз вазифасига қараб қабул қилиш, жўнатиш, саралаш ва бошқа парклар фарқланади.
Станция йўлларини ва паркларни ўзаро бирлаштирувчи стрелкали ўтказгичлар жойлашган зоналар стрелкали бўғиз (9.1-расм) дейилади. Бўғизнинг конструкцияси талабий ўтказиш қобилияти ва ҳаракат хавфсизлигини таъминлаши керак. Бўғизларни лойиҳалашда поездлар ва манёвр ҳаракатларини параллел бажариш имкониятлари таъминланиши керак.
Станция йўллари тўлиқ ва фойдали узунлиги билан фарқланади. Очиқ йўлнинг тўлиқ узунлиги унинг икки томонидаги стрелкали ўтказгичларнинг бошланишидан, берк йўл учун эса йўл бошидаги стрелкали ўтказгич бошидан йўл охиридаги (тўсиқ) тиргаккача ҳисобланади.

9.1-расм. Станция стрелкали бўғзининг чизмаси:
Қ-Ж – қабул қилиш-жўнатиш парки; С – саралаш парки.