7-modul. MÁMleketlik tilde is qaǵazlarín júrgiziw

Túsinik xatı Bizler jańa sabaq kestesin kórmegenimiz sebepli, 2021-jılı 18-sentyabr kúngi qánigelik pánlerine tayarlanbay keldik. Sizden bizlerdi sabaqqa kiriwge ruxsat beriwinińizdi ótinemiz hám aldaǵı waqıtta dıqqatlı bolamız dep sóz beremiz. Qudiyarov B. (qolı) Alimova S. (qolı) Matchanova N. (qolı) Saidov K. (qolı) 00.00.0000.

ISENIM XAT
Isenim xat- qanday da bir mákeme, shólkem yaki bir adamnıń óz atınan ekinshi bir adamǵa isenim bildirip, wákillik bergen jazba túrdegi hújjeti. Ol qanday da bir isti, belgili jumıslardı, mashina aydaw, fermer islerin basqarıw, aqsha, hújjet yamasa qımbat bahalı zatlardı kassadan ekinshi bir adamnıń alıwına isenim bildirilgeni, yaǵnıy óziniń atınan jumıs islewine teńlestirilgen xatı.
Óziniń xızmeti boyınsha isenim xatlar eki toparǵa bólinedi: rásmiy túrdegi isenim xatlar hám jeke puqaralar tárepinen beriletuǵın isenim xatlar.
Jekke isenim xatlardıń kóp tarqalǵan túri – bul is haqı, balalarǵa beriletuǵın napaqa, pensiya hám sud hákimshiliginde is alıp barıwǵa huquq beretuǵınlıǵı haqqında gúwalıq beriwshi túri.
Isenim xat tómendegi tártip penen dúziledi:

1. 
   Hújjettiń atı (Isenim xat).
   
2. 
   Hújjettiń mazmunı.
   

a) Isenim xat berip atırǵan adamnıń pasportta kórsetilgeni boyınsha ismi-sháriypi, pasport boyınsha dárekleri, jumıs ornı, lawazımı, turar jayı tolıq kórsetiledi.
b) Isenim xat berilip atırǵan adamnıń pasportta kórsetilgeni boyınsha ismi-sháriypi, pasport boyınsha dárekleri, jumıs ornı, lawazımı, turar jayı tolıq kórsetiledi.
v) Puldıń muǵdarı, zattıń sanı aldın cifr, keyninen qawıs ishinde sózler menen jazıladı.
3. Sáne, isenim xat beriwshiniń imzası, ismi-sháriypi.
4. Isenim bildiriwshiniń imzasın tastıyıqlawshı adamnıń ismi-sháriypi, jumıs ornı, lawazımı, qolı.
5. Mór basıladı hám tastıyıqlaw sánesi jazıladı.
Isenim xatı mashina aydaw, fermer islerin basqarıw, aqsha, hújjet yamasa qımbat bahalı zatlardı paydalanıw, sud hákimshiliginde is alıp barıwǵa huquq beretuǵınlıǵı haqqında jazılatuǵın isenim xatlar natarius tárepinen jazıladı hám tastıyıqlanadı.
Úlgi:


Isenim xat
Men, Asanova Dámejan Orazbaevna, Nókis rayonlıq kóshpeli mexanzaciyalasqan kolonnasınıń isshisi, Nókis rayonı, A.Shamuratov kóshesi, 21 jayda jasawshı, Tayrov Nuratdin Alibekovichke II-GP №501049, 15.01.1979-jılı berilgen pasportı boyınsha Novosibirsk qalasınan kelgen posılkanı alıwǵa isenim bildiremen.
Asanova D.O. (qolı)
15.07.2021.
D.O.Asanovanıń qolın tastıyıqlayman: (qolı) Nókis rayonlıq mexanizaciyalasqan kóshpeli kolonnasınıń qánigeler bóliminiń baslıǵı.
mór
15.07.2021.