6 olmosh ravish fe’l olmosh

Men, sen olmoshlariga -ni,-ning,-niki qo‘shimchalari qo‘shilganda, talaffuzda bir n tovushi tushib qoladi va shunday yoziladi: men+ning=mening, sen+ning-sening, sen+niki-seniki.
U kishilik olmoshiga –ga, -da, -dan kelishik qo‘shimchalari qo‘shilganda esa talaffuzda bir n tovushi orttiriladi va shunday yoziladi: u+ga – unga, u+da – unda kabi.
Eslatma: Kishilik olmoshlari egalik qo‘shimchalarini qabul qilmaydi.
Kishilik olmoshi u bilan ko‘rsatish olmoshi u shakldosh hisoblanadi. Ular bir-biridan so‘rog‘i,gapdagi vazifasi va qaysi so‘zlar bilan birikib kelishiga ko‘ra farqlanadi.
Misol: U ba'zan tojikcha lahjada gapirardi, ba'zan о‘zbekcha qochirimlar qilardi. U – kishilik olmoshi,kim? so‘rog‘iga javob bo‘ladi,gapdagi vazifasi – ega.
U voqea hech esimdan chiqmaydi. U - ko‘rsatish olmoshi,qaysi? so‘rog‘iga javob bo‘ladi,gapdagi vazifasi – aniqlovchi.
Eski o‘zbek tilida kamtarlik ifodasi sifatida men o‘rnida ko’pincha kamina, kaminayi kamtarin, faqir, qulingiz, bandayi ojizingiz singari so‘z va birikmalar qo‘llangan.
Hozirgi o‘zbek tilida ham xuddi shu ma’noda ba’zan men o‘rnida kamina so‘zi ishlatiladi.
Men olmoshi o‘rnida yuqoridagi so‘zlar ega vazifasida qo‘llanilganda, kesim ba’zan III shaxs shaklida, ba’zan esa I shaxs shaklida (asosan, eski o’zbek tilida)bo‘lishi mumkin. Ammo doimo mazmunan I shaxsda bo’ladi. Masalan: Faqir sizning xizmatingizga bel bog'lagan jumlasida faqir so’zi ega vazifasida qo‘llangan va kesim sifatida qo‘llanayotgan so‘z (bel bog'lagan) III shaxsda qo‘llanmoqda. Bu gapda faqir so‘zi men o‘rnida, bel bog'lagan fe’li belbog'laganman o‘rnida qo‘llanmoqda: Men Sizning xizmatingizga bel bog’laganman.
Ba’zan kesim II shaxda ham qo‘llanishi mumkin. Misol: Sizga ne bo'ldi, ikki haftadan buyon faqiringizni zoriqtirib qo'ydingiz. Ushbu gapda kesim II shaxsda qo‘llanmoqda, sababi olmosh o‘rnida qo‘llanuvchi so‘z ega emas, to‘ldiruvchi vazifasida qo‘llangan. Kesim esa ham shaklan, ham mazmunan II shaxsni ifodalagan.