5-Ma’ruza: Kompyuter lingafon sinflarida bajariladigan mashg’ulotlar turlari va ularni boshqarish usullari

Ta’limda multimediya vositalari, ularning afzalliklari

Ta’lim sohasiga 70- yillarda ilk kompyuterlarni tatbiq etilishi ancha samarasiz bo’ldi. Bu samarasizlik o’sha paytlarda texnikaviy va dasturiy vositalarni ishlab chiqarish sifatini nihoyatda pastligi bilan izohlanar edi hamda dasturiy vositalar unchalik ham moslanuvchan emas edi. Hozirda amaliyot shuni ko’rsatmoqdaki, multimediya vositalari yordamida o’quvchilarni o’qitish ikki barobar samarali bo’lmoqda. Mazkur vosita yordamida o’qitishda an’anaviy ta’lim usullariga nisbatan o’rtacha 30 foizgacha vaqtni tejash mumkin hamda olingan bilimlar o’quvchilar xotirasida uzoq muddat saqlanib qoladi. Ma’lumki, eshitgan materialning to’rtdan bir qismi xotirada qoladigan bo’lsa, o’quvchilarga berilayotgan materiallarni video (ko’rish), orqali amalga oshirsak, axborotni xotirada saqlanib qolishi va tasavvur qilish imkoniyati 25-30 foizgacha oshadi. Shuningdek, mazkur o’quv materiallari lingafon, audio, video va grafika ko’rinishida mujassamlashtirilgan holatda o’quvchilarga berilsa, materiallarni xotirada saqlab qolish 75 foizga oshishi kuzatilmoqda.

Ta’lim sohasida multimediya vositalari yordamida o’quvchilarga bilim quyidagi afzalliklarga ega:

1. 
   Ta’lim jarayonida berilayotgan materiallarni chuqurroq va mukammalroq o’zlashtirish imkoniyatining mavjudligi.
   
2. 
   Ta’lim olishning yangi sohalari bilan yaqindan aloqa qilish ishtiyoqini yanada oshirish.
   
3. 
   Dars jarayonida bilim olish vaqtining qisqarishi natijasida vaqtni tejash imkoniyatiga erishish.
   
4. 
   Olingan bilimlar kishi xotirasida uzoq muddat saqlanib, kerak bo’lganda amaliyotda qo’llash imkoniyatiga erishuvi.
   
5. 
   Lingafondan foydalanish orqali o’quvchining og’zaki fikrlash qobiliyatini va talaffuzini o’stirish.
   

Lekin, mazkur vositani ta’lim jarayoniga qo’llashning ayrim muammolari ham mavjud bo’lib, u quyidagilardan iborat:

1.Ta’lim uchun zarur bo’lgan o’quv materiallarini hamda boshqa zaruriy ko’rsatmalarni qo’llanma shaklida kompyuter dasturlari ko’rinishida ishlab chiqish.

2. Ishlab chiqilgan kompyuter dasturlari uchun multimediya elementlarini qo’llash.