5-bap. Auditorliq tekshiriwdi rejeleshtiriw

5-BAP. AUDITORLIQ TEKSHIRIWDI REJELESHTIRIW
5.1. Auditorlıq iskerligin rejelestiriwdiń maqseti hám wazıypaları

Hár qanday iskerlik, sonıń ishinde auditorlıq iskerligi de nátiyjeli bolıwı ushın aldın-ala, onıń puqta hám anıq rejesi yaki dástúrin dúziw kerek. Olardıń mazmunı qoyılǵan maqset hám onı orınlaw ushın belgilengen anıq wazıypalardan kelip shıǵadı. Audittiń maqsetleri tómendegilerden ibarat: buxgalteriya esabınıń jaǵdayın ekspertiza jolı menen bahalaw, jıllıq finanslıq esabat maǵlıwmatlarınıń haqıyqıylıǵın tekseriw hám tastıyıqlaw, valyuta operaciyaların reviziya qılıw, akciyalar hám basqa bahalı qaǵazlar emissiyası prospektiniń maǵlıwmatların tastıyıqlaw, kárxananıń finanslıq turaqlılıǵın bekkemlew boyınsha ilajlar islep shıǵıw, ekonomika hám finanslıq huqıq tarawındaǵı jańa nızamshılıq hújjetleri boyınsha anıq másláhát (konsultaciya) ótkeriw hám t.b. Auditorlar tekseriw waqtında olar tárepinen orınlanatuǵın jumıslardıń kólemi hám sıpatın tastıyıqlaytuǵın, tiykarǵı hújjetlerden bolıp esaplanǵan, is hújjetlerin dúziwi kerek. Bul hújjetler ıqtıyarlı formada dúzilip, olarda klient haqqındaǵı zárúr maǵlıwmatlar; orınlanatuǵın jumıslardıń tolıq bayanı bolıwı kerek. Sonıń ishinde tómendegiler kórsetiledi: tekseriwdi ótkeriw metodı (tolıq yaki tańlap), yaki tekseriletuǵın hújjetlerdiń kólemi; tekseriw nátiyjesinde anıqlanǵan kemshilikler; tekseriwge usınılmaǵan dáslepki hám basqa hújjetler dizimi; ámeldegi nızamshılıqqa sáykes kelmeslikler; anıqlanǵan kemshiliklerdi saplastırıw usılları haqqında auditordıń pikirleri; klientiniń finans-xojalıq iskerligin jaqsılawǵa qaratılǵan basqa usınıslar.