3. ҚИРҚимлар ички тузилишини чизмада тасвирлаш учун буюм текислик билан фикран кесилади. Буюмнинг кесувчи текислик билан кузатувчи оралиғидаги қисми фикран олиб ташланади. Қ и р қ и м

3. ҚИРҚИМЛАР
Ички тузилишини чизмада тасвирлаш учун буюм текислик билан фикран кесилади. Буюмнинг кесувчи текислик билан кузатувчи оралиғидаги қисми фикран олиб ташланади.
Қ и р қ и м — предметнинг бир ёки бир неча текислик билан фикран кесиб кўрсатилган тасвиридир. Бунда предметнинг фикран қирқилиши айнан шу қирқим учун тегишли бўлиб, предметнинг бошқа тасвирларига ҳеч қандай таъсир қилмайди. Қирқимда деталнинг кесувчи текислик кесиб ўтган жойи ва текисликнинг орқасида кузатувчига кўринган қисмлари кўрсатилади (92-шакл). Кесувчи текислик ойна каби шаффоф деб қаралади. Агар чизманинг яққоллиги бузилмайдиган бўлса, буюмнинг кесувчи текислик орқасида жойлашган элементларининг айримларини тасвирлаш шарт эмас. Кесувчи текисликнинг горизонтал проекциялар текислигига нисбатан вазиятига қараб қирқимлар уч хил бўлади: горизонтал, вертикал ва қия. Буюмнинг горизонтал проекциялар текислигига параллел текислик билан кесилишидан ҳосил бўлган қирқими горизонтал қирқим дейилади (92-шакл, А—А қирқимга қаранг).

Буюмнинг горизонтал проекциялар текислигига перпендикуляр текислик билан кесилишидан ҳосил бўлган қирқими вертикал қирқим дейилади. Вертикал қирқим фронтал ва профил бўлиши мумкин. Агар кесувчи текислик фронтал проекциялар текислигига параллел бўлса, фронтал қирқим дейилади (92-шакл). Кесувчи текислик профил проекциялар текислигига параллел бўлса, профил қирқим деб аталади (92-шакл, Б—Б қирқим).

Буюмнинг горизонтал проекциялар текислигига нисбатан қия вазиятдаги текислик билан кесишдан ҳосил бўлган қирқими қия қирқим дейилади. (93-шакл, Б—Б қирқим). Кесувчи текисликлар сонига қараб қирқимлар оддий ва мураккаб қирқимларга бўлинади:
1. Оддий қирқим — буюмни битта кесувчи текислик билан кесишдан ҳосил бўлади (92-шакл).
2. Мураккаб қирқим — буюмни иккита ёки ундан ортиқ кесувчи текислик билан кесиб ҳосил қилинади (94-шакл).
Мураккаб қирқимлар поғонали ва синиқ қирқимларга бўлинади.