3 бўлим: Шўр ерларда доривор ўсимликларнинг интродукцияси ва биологик хусусиятлари

Доривор галега - Галега (Козлятник) лекарственная

(Galega officinalis L.).
Доривор галега - Fabaceae оиласига мансуб кўп йиллик ўт. Ўсимлик табиатда Ўрта Ер денгизи бўйлари, Балқон ярим ороллари, Кичик Осиё, Эрон, Шимолий Кавказ, Қрим ва Украинада тарқалган. Доривор хом-ашё сифатида ўсимликнинг ер устки қисми ва уруғлари ишлатилади. Уларнинг таркибида галегин алкалоиди, гликозидлар, оқсиллар ва ёғлар мавжуд бўлиб, халқ табобатида сийдик хайдовчи, оғриқ қолдирувчи ва қандли диабет касалликларини даволаш воситаси сифатида фойдаланилади. Ўсимликлар табиий ҳолда бўлганда ёки маданий ҳолда ўстирилганда, уларнинг ўсиши ва ривожланиши учун яхши шароит яратилса, илдиз ва илдиз поясида туганак (азотобактер) бактериялар ривожланади [97,20] ( илова – 297-бет).
Ўртача шўрланган тупроқларда ўсимликлар уруғдан экилди. Уруғ унувчанлиги -20,3% ва сақланувчанлиги -60,0% ни ташкил этди. Дастлабки вегетация йилида ўсимликларнинг ўсиши жуда секин бўлиб, асосий поялар 10,3±0,98 см ўсади ва уларда 4,0±0,89 та барглар ҳосил бўлади. Вегетация охиригача асосий поялардаги баргларнинг 4,6±1,08 та си тўкилганлиги қайд этилган. 2- вегетация йилида эса ўсимликлар бир мунча бақувватлашиб, тез ўсади. Вегетация охирида асосий поялар 38,7±2,74 см га ўсади ва уларда 13,4±1,03 та барглар ҳосил бўлади. Асосий пояларда 16,6±2,13 та 1- тартибли новдалар ҳосил бўлиб, ўртача 8,7±1,79 см га ўсганлиги кузатилган (3.7 жадвал). Кучли шўрланган тупроқларда доривор галега кўчатдан экилди. Ўсимликлар кўчатдан экилганда 60,0 % сақланувчанликни ташкил этди. Вегетация давомида ўсимликлар жадал ўсади ва июн ойида генератив даврга киради. Вегетация охирида эса асосий поялар 42,1±1,41 см ва улардаги барглар сони 14,8±2,67 та ни ташкил этди. Ўсимликларда ўртача 29,0±2,19 та тўп гуллар; 22,0±1,30 та шаклланган тўп мевалар ва 27,0±1,58 та пишган тўп мевалар кузатилди. Доривор галега шўр тупроқларда кўчатдан интродукция қилинганда, ўсимликларнинг вегетация давомидаги ҳолати ва ўсиш, ривожланиш кўрсаткичларига асосланиб, шўрга чидамли эканлиги кузатилади (3.8, 3.9 - жадваллар).