3-4-амалий машғулот Мавзу: Интернет қидирув тизимлари. (4 соат) Ишдан мақсад

3-4-амалий машғулот
Мавзу: Интернет қидирув тизимлари.
(4 соат)
Ишдан мақсад: Талабаларга Интернет тармоғида қидирув тизимлари ҳақида назарий маълумотлар бериш. Қидирув тизимлари билан ишлашни ўргатиш.
Амалий машғулотни ўтказиш учун керакли жиҳозлар: Pеntium-IV компьютер, браузер дастури ва зарурий веб-сайтлар.
Режа:

1. 
   Қидирув тизимлари ҳақида тушунча.
   
2. 
   Қидирув тизимларининг тузилиши ва улар ёрдамида бажариладиган вазифалар.
   
3. 
   Ихтисослашган ахборот қидирув тизимлари.
   
4. 
   Ахборотларни қидириш усуллари.
   

Қўлланиладиган таълим технологиялари: тақдимот, савол-жавоб усули, Т- жадвали.


Назарий маълумот:
1. Қидирув тизимлари ҳақида тушунча.
Қидирув тушунчаси. Интернет тармоғидаги қидирув тушунчаси шуни англатадики, бунда ҳар бир фойдаланувчи ўзига керакли бўлган бирор маълумот ёки материални махсус қидирув тизимлари орқали топиш имкониятига эга бўлади.
Интернет тармоғи фойдаланувчилари қидирувни Интернет муҳитида жойлашган веб-сайтлар, уларнинг манзили ва ички маълумотлари бўйича олиб бориши мумкин. Бу эса фойдаланувчига керакли бўлган ахборотни самарали қидириш ва тез топиш имкониятини беради.
Ахборотларни қидириш. Интернет тармоғи шундай бир муҳитки у ўзида турли кўринишдаги ва турли тиллардаги кўплаб ахборотларни жамлаган. Бунда ушбу ахборотлар ичидан керакли бўлган маълумотларни қидириб топиш муаммоси пайдо бўлади. Интернет тармоғида ҳар бир фойдаланувчи ахборотни қидириш учун ўзбек, рус, инглиз ёки бошқа тиллардаги бир ёки бир неча сўздан ташкил топган сўровлардан фойдаланади. Яъни маълумотларни унинг сарлавҳаси ёки унинг таркибида иштирок этган сўзлар ва жумлалар бўйича қидириб топиш мумкин. Бунда фойдалаувчи томонидан Интернет қидирув тизими қидирув майдонига керакли маълумотга доир сўз ёки жумла киритилади ва қидирув тизими ишга туширилади. Шундан сўнг қидирув тизими фойдаланувчига ўзи томонидан киритилган сўз ёки жумлага мос келувчи маълумотларни қидириб топади ва компьютер экранида уларнинг рўйхатини ҳосил қилади. Ва ниҳоят рўйхатдаги маълумотларни кетма-кет кўриб чиқилиб керакли бўлганлари компьютерга сақлаб олинади.