3. 3-Lekciya Ataması: Tokarlıq stanokları. Jobası

Stanina stanoktıń barlıq tiykarǵı uzellerin ornatıw ushın xızmet qıladı hám stanoktıń tiykarı esaplanadı.

Aldınǵı babka staninanıń shep bólimine bekkemlengen boladı. Aldınǵı babkada stanoktıń tezlikler qutısı boladı, tezlikler qutısınıń tiykarǵı bólimi shpindel` bolıp, ol domalawshı yamasa sırǵanawshı podshipniklerinde aylanadı. Shpindel`, ádette, basınan aqırına shekem konus tárizli tesikten ibarat bolıp, sterjen`li material (zagotovka) áne sol tesikten ótkeriledi.

Artqı babka oraylarǵa ornatılıp, jonılıp atırǵan zagotovkanı uslap turıw, sonday-aq, tesiklerdi burawlaw hám olarǵa islew beriw (buraw, zenker, razvyortkalar) hámde rez`ba qırqıw islerine arnalgan ásbaplardı (metchik, plashkalar) bekkemlew ushın xız­met qıladı. Artqı babka stanina baǵdarlawshıları boylap jıljıy aladı.

Jıljıtıw qutısı shpindel`den yamasa ayrıqsha berlisten jıljıtıw valı yamasa jıljıtıw vintine aylanba háreket uzatıw, sonday-aq, tiyislishe jıljıwǵa erisiw yamasa rez`ba qırqıwda turaqlı adım payda etiw maqsetinde aylanıs chastotasın ózgertiriw ushın xızmet qıladı. Buǵan jıljıtıw qutısınıń berilis qatnasın ózgertiriw jolı menen erisiledi. Jıljıtıw qutısınıń almastırılatuǵın shesternyaları bar gitara qurılmasında stanok shpindeli menen baylanısqan.

Fartuk jıljıtıw valı hám jıljıtıw vintiniń aylanba háreketin supporttıń tuwrı sızıqlı ilgerlenbe háreketine aylandırıw ushın arnalǵan.

Support kesiwshi ásbaptı bekkemlew hám oǵan jıljıw háreketin beriw ushın xızmet qıladı.