23-Variant Ўзбекистон Республикасида давлат бюджети тақсимоти ва солиқ сиёсати

Давлат томонидан ички маблағни жалб қилиш – активларни ички манбалардан (резидент-юридик ва жисмоний шахслардан) жалб этилиши ҳамда бунинг натижасида Ўзбекистон Республикасининг қарз олувчи сифатидаги ёки қарз олувчи резидентларнинг ўз кредитларини (қарзларини) тўлишига кафил сифатидаги мажбуриятлари юзага келиши.
Давлат томонидан хориждан маблағ жалб қилиш – активларни хориж манбаларидан (чет давлатлардан, норезидент юридик шахслардан ва халқаро ташкилотлардан) жалб этилиши ҳамда бунинг натижасида Ўзбекистон Республикасининг қарз олувчи сифатидаги ёки қарз олувчи резидентларнинг ўз кредитларини (қарзларини) тўлашига кафил сифатидаги мажбуриятлари юзага келиши.
Давлат ғазначилик облигациялари – бу аҳоли ва юридик шахслар ўртасида жойлаштириладиган ва пул маблағларини сақловчилар томонидан уларнинг бюджетга киритилишини тасдиқлайдиган ва ушбу қимматли қоғозларга эгалик қилиш муддати давомида қатъий белгиланган даромад олиш ҳуқуқини берадиган давлат қимматли қоғозларидир.
Ғазначилик – Давлат бюджетининг ижросини амалга оширувчи махсус ваколатли молия органидир.
Бюджетлараро трансфертлар – Ўзбекистон Республикасининг республика бюджетидан Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари, давлат мақсадли жамғармаларига ҳамда бунинг аксича ўтказиладиган, шунингдек, Қорақалпоғистон Республикасининг республика бюджетидан, вилоятларнинг вилоят бюджетларидан ва Тошкент шаҳрининг шаҳар бюджетидан туманлар ва шаҳарлар бюджетларига ҳамда бунга аксинча ўтказиладиган маблағлардир.
Маҳаллий бюджет– Давлат бюджетининг тегишли вилоят, туман, шаҳар пул маблағлари жамғармасини ташкил этувчи бир қисми бўлиб, унда молия йили мобайнида даромадлар манбалари ва миқдорлари ҳамда харажатлар йўналишлари ва миқдорлари назарда тутилади.
Мелиорация – ноқулай гидролик, тупроғи ёмонлашган ва бошқа шароитдаги ерлардан янада самарали фойдаланиш мақсадида уларни тубдан яхшилашдир.
Солиқ имтиёзлари – солиқ тўғрисидаги қонун ҳужжатларида белгиланган тартибда солиқ тўлашдан тўлиқ ёки қисман озод қилиш, шунингдек, солиқ тўловчи учун солиқ юкини бошқача тарзда енгиллаштиришдир.