2-tema. Ónim sapasín bahalaw kórsetkishleri

Sociallíq kórsetkishler
Bul kórsetkishler ónimniń sociallíq-zárúrli mútájliklerine juwap bere alíwí hám oníń túrli topar tutíníwshílarí ushín sociallíq áhmiyetin xarakterleydi.
Usí kórsetkishlerge tovarlar óndiristiń sociallíq zárúrligi, tovardíń optimal assortimentke sáykes keliwi, mádeniy eskiriwi hám basqa sociallíq nátiyjeler kórsetkishleri kiredi.
Funkcional kórsetkishler
Ónim sapasíníń olardíń paydalaníw maqsetlerine sáykes keliwi, materiallíq, mádeniy mútájliklerdi qanaatlandíra alíw dárejesin xarakterleydi. Bul kórsetkishler tiykarǵí funkciyalardíń orínlaníwín jetilistiriw kórsetkishi, universallíq kórsetkishleri hám járdemshi operaciyalardí orínlawdí jetilistiriw kórsetkishlerine bólinedi.
Tiykarǵí funkciyalardí orínlawdí jetilistririw kórsetkishleri tutíníwdín paydalí nátiyjesin, ónimniń tutíníwshílar tárepinen paydalaníwda málim mútájlikti qanaatlandíríw dárejesin kórsetedi.
Universallíq kórsetkishi ónimniń óz ornína qarap isletiliwi menen birge, adamlar ushín paydalí basqa maqsetlerde de isletiliwi múmkin ekenligin kórsetedi.
Járdemshi funkciyalardíń orínlaníwín jetilistiriwshi kórsetkish ónimdi “insan-ónim-sírtqí ortalíq” sistemasínda tiykarǵí hám járdemshi xizmetlerdi orínlaw basqíshlarínda: transportirovka, ornatíw, ońlaw, xizmet kórsetiw, saqlaw hám basqa basqíshlarínda ónimniń ózine tán ózgesheliklerin kórsetedi.
Isenimlilik kórsetkishi ónimniń tutíníw yamasa paydalaníw waqtínda jaramlí halda bolíwín kórsetedi. Buǵan toqtamastan islewi, uzaqqa shídamlílíǵí (xízmet kórsetiw múddeti dawamínda úzliksiz islewi), ońlaníwí, saqlaníwshańlíǵí síyaqlí kórsetkishler kiredi.
Ergonometrik kórsetkishler
Ergonometrik kórsetkishler – “insan-ónim” sistemasín xarakterlep, adamzattíń ekologiyalíq, fiziologiyalíq, antropometrikalíq, gigienalíq ózgesheliklerin esapqa aladí.
Gigenalíq kórsetkishler ónimniń adamlardíń miynet hám turmíslíq xizmetiniń gigenalíq shártlerine sáykes keliwin kórsetedi.
Antroponometrik kórsetkishler ónim konstrukciyasí onnan paydalaníp atírǵan waqítta adamlar denesiniń dúzilisine sáykes keliwin kórsetedi.