1Ўзбекистон Республикаси Олий ва ўрта махсус таълим вазирлиги Наманган давлат университети

Жамият ҳаётида аёлларнинг тутган ўрни ҳақдаги дастлабки ижтимоий-фалсафий таҳлилга қараганда XIX асрда юзага келган феминизм АҚШ ва Европада, кейинчалик дунёда эркак билан аёлнинг тенг ҳуқуқлилигини таъминлашга интилди. Бугун феминистларни дунёнинг барча давлатларида учратиш мумкин. У алоҳида феномен сифатида чет эллик К.Амундсен, П.Ж.Бьюкенен, О.Вейнингер, Г.Плоссь, О.Кардави, Дж. Ландрам, А.Пиз, Б.Пиз, Б.Фридан, З.Фрейд, К.Флинт, Э.Фромм, Л.Хабер, Элизабет Паркс каби тадқиқотчилар томонидан ўрганилган. Улар Ғарбда эркак ва аёлнинг ижтимоий-сиёсий тенг ҳуқуқлилиги, бу борада мавжуд, уларни бартараф этиш чора-тадбирлари, баъзан Ғарб феминизми ва Шарқ феминизми ҳақида (О.Кардави) фикр юритадилар. Аммо, улар миллий менталитет, этномаданий анъаналар ва стереотипларнинг хотин-қизларга таъсирини ҳисобга олмайдилар. Ушбу этнопсихологик ва этномаданий омилларни етарли ҳисобга олмаслик ғарб тадқиқотчиларига хосдир.

Айни пайтда, таъкидлаш жоизки, жамиятда, таълим муассасаларида хотин-қизларнинг иқтисодий ва ҳуқуқий билимларини оширишга эътибор қаратиш, уларни ижтимоий ҳимоя қилиш, ҳуқуқбузарлик ва жиноятчилик профилактикасини кучайтириш, хотин-қизларнинг илм билан шуғулланишини, интеллектуал шахсий имкониятларини тўлиқ намоён этиши учун имконият яратиш ҳам бугунги кунда мамлакатимизда олиб борилаётган ислоҳотларнинг муҳим таркибий қисмини ташкил этади.

Хотин-қизларнинг илм билан шуғулланиши унинг оиласи, фарзандлари, қариндош-уруғлари ва қолаверса, бутун жамиятнинг илмли, маданиятли бўлиши учун мустаҳкам пойдевор бўлиб хизмат қилади. Донишманд боболаримиз ҳам таъкидлаганидек, “Эркак илмли бўлса - нари борса бир киши илмли бўлади, аёл илмли бўлса - миллат илмли бўлади”. Демак, қадимданоқ аёлларнинг илмли, оқила, фозила бўлишидан бутун жамият аҳли манфаатдор бўлиб келган.
Шундай экан, масалага илмий-амалий ёндашув, тарғиботнинг метод, шакл ва технологияларини қўллаш, бу борада маънавият, педагогика, этика ва психологиянинг замонавий ютуқларига таянган ҳолда иш олиб бориш жараёнида лойиҳани амалга оширишни тақозо этади.