14-мавзу. Операцион тизимларда файл тизимлари

14-мавзу. Операцион тизимларда файл тизимлари.

Режа:

• Файл тизими функциялари ва маълумотлар иерархияси.
• FAT, VFAT ва FAT32, HPFS ва NTFS файл тизимлари.
• NTFS файл тизим асосий имкониятлари.

 

1. Файл тизими функциялари ва маълумотлар иерархияси.

Файлларни бошқариш тизимлари, кўпгина замонавий ОТларнинг асосини ташкил қилади. Масалан, UNIX ОТ файл тизимисиз ишламайди, унда файл тизими асосий тушунчалардан биридир. Ҳамма замонавий ОТлар файллардан ва улар билан ишлаш учун мос дастурий таъминотидан фойдаланади. Гап шундаки, биринчидан, файл тизими орқали маълумотлар бўйича кўпгина ишлов берувчи дастурлар боғланган. Иккинчидан, бу тизим орқали диск маконини марказлаштирилган ҳолда тақсимлаш ва маълумотларни бошқариш муаммолари ечилади. Ва ниҳоят, фойдаланувчилар ўз маълумотларига мурожаат қилишнинг осон усулларига эга бўладилар, бу маълумотларни, ташқи хотира қурилмаларида жойлаштирадилар.

Турли ОТ лар ва ташқи хотиранинг турли қурилмалари учун яратилган кўпгина файл тизимилари мавжуддир. Уларда, мос равишда маълумотларни жойлама (носитель) да жойлаштиришнинг ҳар хил принципларидан фойдаланадилар.

FAT (File Allocation Table – файлларни жойлаштириш жадвали), FAT32 ва NTFS файл тизимилари билан танишамиз. Айниқса, ҳозирги кунда энг кўп тарқалган файл тизими билан – NTFS билан танишиш муҳим аҳамиятга эгадир.

Файл деганда, одатда номланган, бир хил тузилишга эга бўлган ёзувлардан ташкил топган маълумотлар тўплами тушунилади. Бу маълумотларни бошқариш учун, мос равишда файл тизимлари яратилади. Файл тизими, маълумотлар мантиқий структурасининг ва уларга ишлов бериш жараёнларида бажариладиган амаллар билан иш олиб бориш имконини берди.

Файл тизими, маълумотларни дискларда ёки бирор-бир бошқа жамламада ташкил этиш усулини аниқлайди. Файл тизимининг қабул қилинган спецификациялари бўйича, файллар билан ишлашни амалга оширувчи махсус тизимли дастурий таъминотни, кўпинча файлларни бошқарув тизими дейилади.