133 so 'z Go'zallikta'rifi

Tergovchilik - qiyin kasb
Tergovchilik kasbi juda mas’uliyatli bo‘lib, u chin yurakdan va aql bilan ishlashni talab qiladi. Tergovchi ishga tortilgan har bir insonning taqdiriga xolislik bilan yondashadi, uning xatti-harakatlarini puxta tekshiradi.
Modomiki, insonning “aybi tasdiqlanmagan va sud bo‘lib o‘tmagan ekan, u jinoyatchi hisoblanmaydi. Shuning uchun ishdagi barcha nozik jihatlarni o‘ylab puxta tekshirish tergovchiga tergovni mantiqiy nihoyasiga yetkazish, haqiqatni aniqlash imkonini beradi. Kimki tergov amaliyoti bilan tanish bo‘lsa, bu ish nihoyatda og‘ir va mas’uliyatli ish ekanligini anglab yetadi. Jinoyatni tez va samarali fosh etish uchun maxsus guruhlar tashkil etiladi. Ularga jinoyat qidiruv inspektori yoki iqtisodiy jinoyatlarga qarshi kurash inspektori (jinoyat xarakteriga bog‘liq ravishda), ekspert - kriminalistlar (agar bunga zarurat bo‘lsa), sud - tibbiyot ekspertlari, kinologlar hamkorlik qiladilar. Ularning barchasi qat’iy belgilangan ma’lum vazifalarni bajaradilar. Har bir xodim jinoyatni o‘zi yaxshi biladigan u yoki bu soha bo‘yicha ochib berish yuzasidan ishlaydi. Har kim o‘zi uchun javob beradi.
(142 so‘z)
Vaqt qadri
Tarixda mangu yashagan inson bo‘lmagan. Shuning uchun inson yashashga intilishi kerak. Yashashga intilish bu vaqtni qadrlash, har bir kunni iloji boricha mehnat va foydali ishlarga sarflashdan iborat. Vaqtni yo‘qotish, vaqtni behuda o‘tkazish - dahshatlarning dahshatlisi bo‘lib, u insoniyatga tabiiy ofatlar va epidemiyalardan ham kattaroq zarar keltiradi. Hayotga endigina qadam qo‘yayotgan inson o‘zining tabiiy tajribasizligi tufayli vaqtga e’tiborsiz munosabatda bo‘ladi. O‘zini yaqindagina tug‘ilgan, hali oldinda oxiri ko‘rinmaydigan bepoyon hayot yo‘li turgandek his qiladi. Quyidagi oddiy ma’lumot kamdan kam odamning o‘y- xayoliga keladi.
Aytaylik, bir odam 70 yil, ya’ni 25567 kun yashaydi. Tarixga nazar tashlasak, buyuk shaxslarning aksariyati buncha yil yashamaganlar. Holbuki, bu tarix nuqtayi nazaridan juda kichik vaqt. Inson uchun tabiatdan berilgan ana shu vaqtga uyqu, kasallik va dangasalik deb ataluvchi uch dushman o‘z hukmini o‘tkazmoqchi bo‘ladi.
(126 so‘z)
Yevro
Yevro - “Yevropa” qit’asi nomining qisqartirilgani bo‘lib, shu qit’aga tegishli pul birligini bildiradi. “Yevro” - Yevropa Ittifoqiga birlashgan mamlakatlarning yagona valutasidir. Yevroning kiritilishi - Ikkinchi jahon urushidan keyingi davrda qator Yevropa davlatlari amalga oshirayotgan izchil birlashishga qaratilgan siyosatning ijobiy hosilidir. Birinchi va Ikkinchi jahon urushlari, 1929-yilgi “Buyuk iqtisodiy krizis”, jahonning barcha burchaklarida tinimsiz olib borilgan milliy-ozodlik urushlari jahonning yetakchi kapitalistik davlatlarini mustamlakachilik va agressiya yo‘lidan voz kechishga majbur qildi. Bu harakat Ikkinchi jahon urushidan keyin Fransiya va Germaniyaning iqtisodiy yaqinlashishidan boshlandi. Umum yevropa birligi uchun harakat asta-sekin mustahkamlanib borib, 1991-yilda Gollandiyaning Mastrixt shahrida Yevropa mamlakatlari iqtisodiyotini birlashtirishning strategiyasi belgilandi, yagona bHudjet va moliya siyosati haqidagi shartnoma 1992-yil fevralida imzolanib, 1993-yilda kuchga kirdi, 1994-yilda qator yangi qadamlar qo‘yildi. 1998-yilda bu jarayonning uchinchi bosqichi boshlandi va Yevropaning yagona valuta-iqtisodiy fazosi yuzaga keltirildi. Yevropa Markaziy banki tashkil qilinib, Yevropa Ittifoqi mamlakatlarining umum pul-kredit siyosati amalga oshira boshlandi va 1- yanvardan Yevropa Ittifoqi bo‘yicha yagona pul birligi “Yevro” kiritildi.
(155 so‘z)