10-Amaliy: Yuk ko’taruvchi konstruktsiyalarni almashtirish

Yaxlit quyma temirbetonni qo’llash

Ob’ektlarni rekonstruktsiyalashda turli konstruktsiyalarda yaxlitquyma beton va temirbeton keng qo’llaniladi. Yaxlit quyma temirbeton qo’llanishi bilan orayopma va yopma konstruktsiyalarni restavratsiya ishlari ancha yengillashadi, rejalashtirish ishlarini chegaralari kengayadi va og’ir kranlar va montaj mexanizmlarini ishlatish kerak bo’lmaydi. Yengil yaxlitquyma betondan har xil shaklda devorlar, orayopmalar yangi karkas va poydevorlar tayyorlash mumkin. Binoning yer osti va yer usti qismlari turli temirbeton konstruktsiyalarni kuchaytirishda yaxlit quyma beton ko’p ishlatiladi. Yaxlitquyma betondan poydevor va orayopmalarni kuchaytirishda ko’proq foydalaniladi. Ularni ayniqsa industrial usullar bilan tayyorlangan buyumlar bilan birgalikda qo’llash samaralidir.

Rekonstruktsiya qilinayotgan ob’ektlarda yaxlit quyma beton qo’llanganda qorishmani sifatiga, tarkibiga, to’ldirgichlarni yiriklik moduliga va konus cho’kishiga alohida e’tibor berish lozim. Beton qorishmasini beton nasoslar bilan tashishda yuqori oquvchanlik katta ahamiyatga ega. Lekin betonni oquvchanligini oshirish, suv-tsement nisbatini oshishiga olib kelishi mumkin. Bu esa beton qorishmasini qatlamlanishiga va konstruktsiyani yuqori qismida suyuq fazani yig’ilishga olib kelib, kirishish darzlar paydo bo’lishiga, betonni g’ovakligini oshishiga va ekspluatatsiya tavsifini kamayishiga olib keladi.

Tik yuk ko’taruvchi konstruktsiyalarni yaxlitquyma betonlashda tanaffus qilishga yo’l qo’yilmasligi kerak, beton qorishmasining har bir berilgan portsiyasini qatlamlab zichlashni ta’minlash, betonning qotishi uchun ijobiy xaroratni ushlab turish va keraklik mustahkamlik olish uchun sharoit ta’minlash zarur.