1-Республика психологлар конференцияси учун тақдим этилган ишланма

1-Республика психологлар конференцияси учун тақдим этилган
ИШЛАНМА
МАВЗУ: Ота-оналар ва фарзандлар ўртасидаги айрим психологик муаммолар ва уларни ҳал қилиш йўллари.


МУАЛЛИФ: Давлатов Жўрақул, Бухоро вилояти Олот тумани,
16-мактаб директорининг ўқув ишлари бўйича ўринбосари, тел: [phone]

«Тарбия-биз учун ё ҳаёт,ё мамот,ё нажот, ё ҳалокат, ё саодат ,ё фалокат масаласидир».

А.Авлоний.
Дунёда фарзандлар тарбияси ҳақида жуда кўплаб асарлар ёзилган.Аксарият китоблар эса насиҳатлар шаклида эканлиги маълум. Оилада фарзандлар тарбиясини айнан бир китоб йўли билан олиб бориб бўлмайди. Бундан ташқари фарзандлар ва ота-оналар ўртасида юзага келадиган муаммолар ечимининг ҳаммасини ҳам китоблардан топиб бўлмайди.
Ёши ўтган бир кекса кишидан “ёшлик ва кексаликнинг нима фарқи бор?” деб сўраганларида у “ёшлик-шундай даврки-унда барча муаммоларни ечишда кишида куч-қувват ва имконият топилади, аммо ақл етарлича иш бермайди. Кексалик-шундай даврки-барча муаммоларни ечишга ақл топилади, аммо куч-қувват етишмайди”деган экан. Шунинг учун ҳам катталарнинг ёшларга-фарзандларига, невараларига ва яқинларига доимо насиҳат қилиб туришларининг замирида биз билмаган юқоридаги қонуният ётади.
Ҳар бир ота-она фарзандининг ҳар томонлама тўкис бўлишини-яхши ўқишини, доимо олдинги сафларда бўлишини, саранжом-сариштали, меҳнатсевар, мард ва албатта бахтли бўлишларини истайди. Аммо ҳар доим ҳам улар орзу қилгандай бўлавермайди. Уларнинг фикрича болалар маъсулиятсиз, ёмон ўқишади, тартиб бузишади, катталарнинг айтганларини улар истагандай бажаришмайди, ёлғон ишлатишади ва ҳокозо. Бунинг натижасида эса болалар ва катталар ўртасида психологик зиддиятли муаммолар келиб чиқади. Бу зиддиятларни бартараф қилишга кўпинча йўл топилмайди ёки ҳар ким масалани ўзича ҳал қилишга уринади.