1. Nemis korporativ boshqaruv modelining mohiyati va uning o’ziga xos xususiyatlari

Немисча моделда корпорацияларнинг акциядорлар томонидан маъқуллаши талаб этиладиган ҳаракатлари

Акциядорлар томонидан маъқуллаши талаб этиладиган ҳаракатлар – бу соф даромадни тақсимлаш (дивидендлар тўлаш, маблағлардан фойдаланиш), Бошқарув ва Кузатув кенгашининг ўтган молия йилидаги қарорларини ратификация қилиш, кузатув кенгашини сайлаш, аудиторларни тайинлаш.

Ижро этувчи кенгаш (Бошқарув) ва Кузатув кенгашининг қарорларини тасдиқлаш амалда “маъқуллаш муҳрини” ёки “ишонч вотумини” англатади. Агар акциядорлар алоҳида аъзолар ёки умуман Кенгашга қарши юридик ҳаракатларни қўллашни исташса, улар кенгашининг ўтган йилдаги қарорларини ратификация қилишдан воз кечишади.
Инглиз-америкача ва япон моделларидан фарқли ўлароқ акциядорлар Кузатув кенгашининг сони ёки таркибини ўзгартиришга ҳақли эмаслар. Кенгашнинг сони ва таркиби қонунда белгилаб қўйилади.
Акциядорлар томонидан маъқуллаши талаб этиладиган бошқа ҳаракатлар жумласига қуйидагилар киради: харажатларни амалга ошириш тўғрисида қарор, филиаллар билан ҳамкорлик, Уставга тузатишлар ва ўзгартиришлар киритиш (масалан, тасдиқланган фаолият турини ўзгартириш), Кузатув кенгаши аъзоларига тўланадиган мукофотнинг энг юқори миқдорини ошириш. Акциядорлар томонидан маъқуллаши талаб этиладиган фавқулодда ҳаракатлар – бу қўшилиш, акцияларнинг назорат пакетини харид қилиш ва қайта ташкил этилиш.
Германияда акциядорларнинг таклифлари – бу одатий (оддий) иш. Йиллик умумий йиғилишнинг кун тартиби эълон қилинганидан сўнг акциядорлар ёзма равишда икки хилдаги таклифни киритишлари мумкин: қарши таклиф, яъни Бошқарув ва/ёки Кузатув кенгашининг йиғилиш кун тартибига киритилган таклифига зид таклиф. У дивидендлар миқдорини ошириш ёки камайтириш ёки, масалан, Кузатув кенгашига муқобил номзодни кўрсатиш масаласига тааллуқли бўлиши мумкин. Акциядорлар таклифи йиғилиш кун тартибига киритиладиган қўшимчаларни ўзида мужассам этиши мумкин. Акциядорлар таклифларига мисоллар: Кузатув кенгашига муқобил номзодлар, махсус текширувларни ўтказиш, овоз бериш ҳуқуқи учун чекловларни бекор қилиш, сармоя таркибини ўзгартириш юзасидан тавсиялар.
Агар ушбу таклифлар барча белгиланган талабларни қондирса, корпорация улар тўғрисида эълон қилиши ва акциядорларни йиғилиш бошлангунга қадар хабардор қилиши лозим.