1-мавзу: Ўзбекистон республикасида илмий ва инновацион фаолиятни

Ҳисоботларни тайёрлаш ва топшириш.
Илмий фаолиятга оид давлат дастурлари доирасида бажарилаётган лойиҳаларнинг ҳисоботлари молиявий йил якунида Инновацион ривожланиш вазирлигига топширилади.
Ҳисоботлар ГОСТ 7.32-2001 – илмий-тадқиқот ишларига давлатлараро стандарт талабларига мувофиқ тузилган ҳисобот ёки илмий-техник маҳсулотлар шаклида тайёрланади.
Ижрочи ташкилот томонидан Инновацион ривожланиш вазирлигига қуйидагилар тақдим этилади: илмий-тадқиқот лойиҳалари ижрочи ташкилотининг расмий бланкидаги йўлланма хати; тадқиқот лойиҳалари ҳақида ҳисобот; давлатлараро стандарт талабларига мувофиқ тузилган ГОСТ 7.9-95 “Хулоса ва аннотация. Умумий талаблар” реферат. Ҳисоботларнинг қоғоз вариантлари қаттиқ муқовали жилд ва электрон шаклда топширилади. Якунланган илмий лойиҳаларнинг ҳисоботларини қабул қилиш тегишли ҳужжатлар билан расмийлаштирилади. Ҳужжатлар ижрочи ташкилот ва лойиҳа раҳбари томонидан имзоланади ва буюртмачи томонидан тасдиқланади.
Лойиҳа раҳбари ва ижрочи ташкилотларга қўйиладиган талаблар
Давлат буюртмаси асосида амалга ошириладиган барча турдаги илмий лойиҳалар илмий раҳбарлари илмий даражага эга бўлиши шарт (ёш олимлар лойиҳалари бундан мустасно).
Фундаментал, амалий ва инновацион лойиҳаларнинг ҳар бир ижрочиси фақат бир лойиҳада тўлиқ ставкада ва икки лойиҳада ўриндош сифатида иштирок этиши мумкин, бунда уларнинг умумий улуши икки тўлиқ ставкадан ошмаслиги лозим.
Тадқиқотнинг бажарилиши, илмий-техник савияси, ҳисоботларнинг белгиланган муддатларда топширилиши, молиявий маблағларнинг самарали ва мақсадли сарфланишида лойиҳа раҳбари ва ижрочи ташкилот раҳбари шахсан жавобгардир.
Ижрочи ташкилот лойиҳани амалга ошириш учун зарур шарт-шароит яратади, илмий ёки илмий-техник кенгашда ҳисоботларни муҳокама қилади, лойиҳа раҳбарининг таклифига кўра, тадқиқотларнинг сифатли бажарилишини таъминлаш учун “вақтинчалик илмий жамоа” ташкил этади.
Вақтинчалик илмий жамоага бошқа ташкилотларнинг ходимлари ҳам жалб этилиши мумкин. Ташкилот раҳбари буйруғи билан лойиҳа раҳбари жамоа раҳбари этиб тасдиқланади.