1-мавзу ҳУҚУҚшунос мутахассис шаклланишида замонавий иш кўникмалари ва компетенцияларнинг роли

8-МАВЗУ


КАЗУС (МУАММОЛИ САВОЛ) ВА МАНТИҚИЙ САВОЛЛАР ТАҲЛИЛИ. ЖАВОБЛАРНИ ТЎҒРИ ТАҚДИМ ЭТИШ


Мавзунинг асосий масалалари

1. Юридик мантиқий савол ва казус. Ўзаро умумий ва фарқли жиҳатлари.

2. Жавобларни тўғри ёзиш ҳамда кўчирмачилик – плагиатдан сақланиш
талаблари.
3. Ёзма жавобни шакллантириш қоидалари. Мантиқий изчиллик, умумийдан хусусийга қараб ёритиш, кириш, асосий висм ва хулосани шакллантириш, фикрни асослантириш, мухокама, асослантириш, шахсий фикрни баён қилиш.
4. Иқтибос (цитата), ҳавола (сноска) вa адабиётлар рўйхати.
Зарурий адабиётлар:
Методические рекомендации для студентов по написанию ответов на логические вопросы и казусы. – Т.: ТГЮУ, 2019. – 68 с.
McBride N.J. (2007). Letters to a Law Student A guide to studying law at university. Pearson Education Limited, UK. 118-165 p.

BastC., Margie A. (2012). Hawkins Foundationsof Legal Research and Writing. 5th Edition. Cengage Learning, USA. 3-14 p.

1. Юридик мантиқий савол ва казус. Ўзаро умумий ва фарқли жиҳатлари.
Олий таълим муассасалари ўқув жараёнига модулли ўқитиш тизимини жорий этиш талабанинг фундаментал назарий билимлари ва амалий кўникмалари ўртасидаги узвий боғлиқликни таъминлашга қаратилган бўлиб, у тўлақонли мутахассисни шакллантиришга ёрдам беради. Модулли ўқитиш тизимининг асосий вазифаси – ўқув жараёнини замонавий ўқитиш усуллари, педагогик, ахборот-коммуникация, инновацион технологиялар асосида назарий ўқитиш ва ҳуқуқни қўллаш ўртасидаги узвий боғлиқликни таъминлаш, талабаларнинг аналитик (таҳлилий) фикрлашини ривожлантириш, билимларни мустақил равишда эгаллаш ва ундан фойдаланиш қобилиятига таянишни ўргатишдан иборат.
Ушбу вазифанинг бажарилиши эса "кейс стади" ўқитиш технологиясини қўллаш, талабаларнинг танқидий, мантиқий фикрлашларини ривожлантириш натижасида таъминланади. Бўлажак юрист дунёда, хусусан, бизнинг жамиятда содир бўлаётган воқеаларга нисбатан ўзининг мустақил, танқидий нуқтаи назарига эга бўлиши, ҳуқуқий майдоннинг самарадорлиги муҳим принцип – қонун устуворлиги билангина таъминланиши мумкинлигини чуқур англаши лозим.
Юридик фанлар бўйича мантиқий ва муаммоли саволлар (казуслар)га жавоб ёзиш модулли ўқув машғулотларининг кенг тарқалган шаклларидан бўлиб, улар ёрдамида келажак юристлари зарур касбий кўникмаларни, хусусан, фикрларни қоғозда мантиқий ва асосли тақдим этиш маҳоратини ривожлантирадилар. Шунингдек, у талабаларда тегишли меъёрий-ҳуқуқий базани топиш ва уни тўғри, ўринли қўллаш кўникмасини ҳосил қилади.